Հրդեհված անտառներ. արջերը փախել են, սողուններն ՝ այրվել (տեսանյութ)
Վայոց ձորի մարզի Արտավան համայնքի տարածքում օգոստոսի 10-ից բռնկված հրդեհն այրել է 670 հա, որի 370-ը՝ անտառային հողեր են, 256-ը՝ բուն անտառածածկ տարածք: Ընդ որում, 202 հա-ն գիհի անտառներն են, իսկ գիհի ծառը բնական ճանապարհով չի վերականգնվում: Սրանք նախնական տվյալներ են, որոնք հրապարակում է Բնության համաշխարհային հիմնադրամի՝ WWF հայաստանյան մասնաճյուղի տնօրեն Կարեն Մանվելյանը՝ համեմատելով անօդաչու թռչող սարքով նկարահանվածը համապատասխան քարտեզային տվյալների հետ։ Կազմակերպության ներկայացուցիչները շտապել են Արտավան՝ տեղում իրավիճակը գնահատելու համար։ Վայոց Ձորի անտառտնտեսության պետ Մուրադ Հարությունյանը մեր թղթակցին պատմել է, որ հրդեհի ժամանակ լսվել են թռչունների աղիղորմ ձայներ. շատ հնարավոր է, որ նրանք չեն կարողացել փրկել իրենց ձագերին: Ենթադրվում է, որ անտառի բնակիչները՝ գորշ արջը, նապաստակը փախել են, իսկ սողուններն ու մկները՝ այրվել: Չնայած կրակը մարվել է, բայց ժամանակ առ ժամանակ կրկին բռնկվում է։ Քամին նպաստում է դրա տարածմանը: Կրակ մեկուսացնող սահմանը Արջի հետքը Փռվող գիհին գրանցված է Կարմիր գրքում ՀՀ քննչական կոմիտեի Վայոց Ձորի մարզային քննչական վարչությունում քննվող քրեական գործի շրջանակներում ձեռնարկված միջոցառումների արդյունքում նախնական տվյալներ են ձեռք բերվել Վայոց ձորի մարզում՝ Արտավան գյուղում հրդեհի բռնկման պատճառների վերաբերյալ։ Դեպքի առթիվ հարուցվել է քրեական գործ՝ ՀՀ քրեական օրենսգրքի 186-րդ հոդվածի 2-րդ մասով և 297-ի 1-ին մասով, որով նախաքննությունն իրավականացվում է ՀՀ ՔԿ Վայոց ձորի մարզային քննչական վարչությունում։ Մշակվել է քննչական պլան, աշխատանքայի վարկածներ եւ ձեռնարկվում են անհրաժեշտ քննչական եւ դատավարական այլ գործողություններ՝ հրդեհի առաջացման բոլոր հանգամանքները պարզելու ուղղությամբ։ Հարցաքննության ժամանակ գյուղացիներից մեկի հայտնած տվյալների համաձայն՝ հրդեհը բռնկվել է խոտածածկ տարածքում ավտոմեքենայի խլացուցիչից դուրս թռած կայծի հետեւանքով։ Մատնանշված հանգամանքներն ստուգվում են։