Ընտանիք, կյանք,խաղաղություն՝ մի բրդուճում
Ենոքավանում լավաշով «ստեղծվեց» 20 մետր երկարությամբ խաղաղության մեծ բրդուճը՝ հայկական խոտաբույսերով և Հայաստանում ու տարբեր երկրներում արտադրված պանրատեսակներով։ Բրդուճը խորհրդանշում է ընտանիք (հաց), կյանք (հայկական խոտաբույսեր) և խաղաղություն (պանրատեսակներ): Տավուշի մարզի Ենոքավան համայնքում կայացավ ամենամյա «Հայ բույս» փառատոնը: Այն զբոսաշրջության ոլորտի զարգացմանն ուղղված նախագիծ է, որն անցկացվում է 2015 թվականից: Ըստ կազմակերպիչների՝ «Հայ բույս» փառատոնի այցելուների քանակը տարեցտարի ավելանում է՝ այս տարի հասնելով մոտավորապես 1500-ի։ «Հայ բույս» փառատոնի այս տարվա նորույթը «Հայաստանի գույներ» 10 մետրանոց գեղարվեստական կտորից պաննոն էր, որի վրա ներկայացված էին փառատոնի մասնակիցների լոգոները՝ կնիքի տեսքով և հյուրերի մատնաներկերով նկարազարդումները: Փառատոնի ավարտին կտորի մասերը որպես վզկապեր բաժանվեցին ներկաներին: Փառատոնի ընթացքում տեղի ունեցավ նաև «Ենոքավանյան պոլո» ձիերով շոուն: Միջոցառումներն ուղեկցվեցին թատերական և երաժշտական ներկայացումներով, ելույթ ունեցան Միքայել Ոսկանյանն իր «TurUp» քառյակով, ջութակահարուհի Սոնա Ազարյանը, DJ Beatman-ը, Իջևանից «Puzzle's 5 peaces» խումբը և DJ Համոն: