Նոր զարգացումներ՝ Բուդաղյանների գործով (տեսանյութ)
Հունիսի 1-ին կլրանա 4-րդ տարին այն ողբերգական օրից, երբ Սյունիքի նախկին մարզպետ Սուրիկ Խաչատրյանի որդու եւ թիկնապահի կրակոցներից սպանվեց Ավետիք Բուդաղյանը եւ ծանր մարմնական վնասվածք ստացավ Արտակ Բուդաղյանը: Այս տարիների ընթացքում Բուդաղյանները չեն դադարեցրել պայքարը: «Արդարությունը վերականգնելու համար նրանք շարունակելու են պայքարել, որքան էլ դա երկարատեւ կամ դժվար լինի: Շուտ թե ուշ մեղավորները բացահայտվելու են, թող չհուսան, որ կարողանալու են այս պատմությունից մաքուր դուրս գալ»,- այսօր լրագրողների հետ հանդիպման ժամանակ ասաց փաստաբան Հայկ Ալումյանը: Այս ընթացքում Սահմանադրական դատարանը գործին տվել է գնահատականներ, իսկ Վերաքննիչ դատարանը մասամբ համաձայնել է իրենց բողոքի փաստարկների հետ: «Սա նշանակում է, որ Բուդաղյանների գործով պետք է տեղի ունենա բաց, հրապարակային դատավարություն, որի ընթացքում կպարզվի, թե արդյո՞ք Ավետիք Բուդաղյանն է նախահարձակ եղել, իսկ Սուրիկ Խաչատրյանը եւ մերձավորները պաշտպանվել են, թե՞ հակառակը՝ նրանք են հարձակվողները եղել եւ մեղավորը այս ամբողջ դեպքերի»,- ասաց Հայկ Ալումյանը: Հայկ Ալումյանը ներկայացնում է նաեւ զինված հանցախմբի գործով կալանավորված Պաշտպանության նախկին փոխնախարար Վահան Շիրխանյանի շահերը: Իր պաշտպանյալի նկատմամբ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանը որոշել է նշանակել դատաբժշկական փորձաքննություն՝ պարզելու համար նա կարո՞ղ է մասնակցել դատական նիստերին, թե՞՝ ոչ: «Դատավարությանը մասնակցելու հարց մեր կողմից երբեք չի բարձրացվել: Մեր կողմից միշտ բարձրացվել է այն հարցը, որ պարոն Շիրխանյանը չի կարողանում գալ հասնել դատարան: Դատարանում ինքը կարող է նստել եւ մասնակցել: Փոխարենը մի հատ սայլակ գտնեն եւ պարոն Շիրխանյանին բերեն դատարան»,- ասաց Հայկ Ալումյանը: Նրա խոսքերով՝ փորձագիտական հանձնաժողովի անդամները այցելել եւ հետազոտել են Վահան Շիրխանյանին եւ նրա բժշկական փաստաղթերը: Վահան Շիրխանյանին տեղափոխել են նաեւ Գրիգոր Լուսավորիչ բժշկական կենտրոն՝ ապարատային հետազոտություններ անցկացնելու համար: Այսօր սպասում են հանձնաժողովի նիստի օրվան, որի ընթացքում էլ հանդես կգան եզրակացությամբ: