Համաներում չեղավ Հիմնադիր խորհրդարանի անդամների պատճառո՞վ (տեսանյութ)
Համաներումն անհրաժեշտություն է, հատկապես մեր երկրում, որտեղ դատական անկախությունը կասկածի տակ է, իսկ արդարացումներն ընդամենը մեկ տոկոսի են հասնում. այս մասին այսօր ասել է Հայաստանի Հելսինկյան կոմիտեի նախագահ Ավետիք Իշխանյանը։ Ըստ իրավապաշտպանի՝ համաներումը փաստորեն իշխանության բարի կամքի դրսեւորումն է, եւ դատապարտյալը ինչ- որ չափով փրկվում է՝ հաշվի առնելով մեր կալանավայրերի վիճակը։ Ու նաեւ իշխանությունները համաներումը օգտագործում են որպես պատրվակ` բանտերը բեռնաթափելու համար. «Հին, բետոնապատ, չնորոգված, ջուրը ժամով տրվող, օդափոխություն չունեցող խցերում 25 հոգի են մնում»։ «Իրավունքի գերակայություն» ՀԿ նախագահ Արտակ Զեյնալյանը ընդգծում է՝ 8 հոգու համար նախատեսված խցում չի կարող 9-րդը լինել. «Այսինքն՝ մնացած 12 հոգին ապօրինի են նստած»։ Փաստաբան Լուսինե Սահակյանի գնահատմամբ՝ համաներման հատուկ քաղաքականություն Հայաստանում չի գործում։ Փաստաբանը համոզված է ՝ բանտերի գերծանրաբեռնվածությունը ձեռնտու է ՔԿՀ-ի պաշտոնյաներին։ Կալանավորին սննդի համար օրեկան 1500 դրամ է պետությունը հատկացնում, սակայն գումարը չի ծառայում իր նպատակին. «Մենք մոնիտորինգ էինք անցկացնում եւ տեսնում. դա ուղղակի ուտելիք չէ, որ տրվում է նրանց»։ 1991թ –ից ի վեր Հայաստանում տեղի է ունեցել 9 համաներում։ Առայժմ հայտնի չէ, թե երբ կհայտարարվի 10-րդ համաներումը։ Քննարկման ավարտին Ավետիք Իշխանյանը, հղում կատարելով թեմայի շուրջ տարվող խոսակցություններին, ենթադրեց, որ համաներումը նախատեսվում էր ապրիլ ամսվա մեջ իրականացնել, սակայն հետաձգելու որոշում կայացվեց: «Իմ կարծիքով համաներումը պետք է իրականացվեր Ցեղասպանության 100-րդ տարելիցի կապակցությամբ: Սակայն այն հետաձգվեց, քանի որ կալանավորվեցին Հիմնադիր խորհրդարանի անդամները (որոնք նախատեսել էին իշխանության դեմ բողոքի ցույցեր իրականացնել Երևանում ապրիլի 24-ին)», - եզրափակեց նա: