«Գլենդել Հիլզ»-ի տարածքը տրվել է գործարարին` «Հին Երևան» նախագծի համար (տեսանյութ)
«Հին Երևան» նախագիծը կենդանության նշույլներ է ցույց տալիս։ Նախագծի հեղինակ, ճարտարապետ Լևոն Վարդանյանը լրագրողներին տեղեկացրել է, որ մինչև 2019 թվականն իր չափագրած բոլոր շենքերը վերականգնված կլինեն և նախախորհրդային շրջանի Երևանի սիրահարները հնարավորություն կունենան վայելելու այդ շրջանի ճարտարապետությունը։ «Ազգային, բնակելի հրաշալի տներ են եղել, որ հիմա չկան, պետք է վերականգնենք»,-շեշտել է ճարտարապետը։ Նրա խոսքով՝ վերջին տարիներին մայրաքաղաքում ոչ մի շենք չի ապամոնտաժվել, բոլորը քանդվել են, բացառությամբ Տերյան 11 հասցեի։ Իսկ վերականգնվող շենքերը հավանաբար կծառայեն որպես թանգարաններ։ Պարոն Վարդանյանի խոսքով՝ հիմա Երևանում այնպիսի շենքեր են կառուցվում, որ չես հասկանում իսպանացու, իտալացու, թե մեկ այլ ազգի մարդկանց տներ են։ Ասում է՝ Երևանում ու Թիֆլիսում Հուշարձանների բաժին միաժամանակ է բացվել, բայց այնտեղ կարողացան պահպանել հինն, ի տարբերություն մեզ։ Հիշեցնենք, որ նախագծի ֆինանսական կողմն ապահովողը Վարդան Սիրմակեսն է, ով մեր երկրում այլ ծրագրերի համար է մինչ այդ ներդրում արել։ ««Գլենդել Հիլզ»-ի տարածքն «Օլդ սիթի» կազմակերպության միջոցով տրվել է շվեյցարահայ գործարարին, որպեսզի իրականություն դառնա այս ծրագիրը»,-նշել է նախագծի հեղինակը։ Պայմանագրի համաձայն՝ ներդրողը նվազագույնը 120 մլն դոլար պետք է տրամադրի։ Մինչև հաջորդ տարվա մարտի 1-ը նախագծի մանրակերտը պետք է պատրաստ լինի, որպեսզի դրվի հանրային քննարկման։
