Բացել լրահոսը Փակել լրահոսը
A A

ՇՏԱՊ ՕԳՆՈՒԹՅՈՒՆԸ ՏԵՂ Է ՀԱՍՆՈՒՄ ՈՒՇԱՑԱԾ

Մարզեր

Շիրակի մարզի շտապ բուժօգնության կայաններում այս տարվա հունվարին արձանագրվել է 2908 կանչ, որից 2286-ը Գյումրիում: Կանչերի հիմնական պատճառ են հանդիսացել հիպերտոնիկ հիվանդությունների սրացումներն ու ինսուլտները: Գյումրիում շտապ բուժօգնության կայանի եւ թաղամասերի միջեւ միջին հեռավորությունը 6 կմ է, շտապօգնության մեքենան կանչի վայր է հասնում մոտավորապես 7-11 րոպեում: Սակայն ձմռան ամիսներին ուշացումներն անխուսափելի են:

Սառցակալած եւ չմաքրվող փողոցներին գումարվում է մեքենաների մաշվածությունն ու անսարքությունը: Կայանը տասնհինգ մեքենա ունի, տասնհինգն էլ շարքից դուրս են եկած, եւ հազիվ են շահագործվում: Դրանց վերանորոգման համար միայն 2005թվականին ծախսվել է 7.5մլն դրամ: Առողջապահության նախարարությունը չնայած բազմիցս է խոստացել թարմացնել ընկերության ավտոպարկը, սակայն մինչ օրս խոսքը գործի չի վերածվել:

ԱՇԽԱՏԱՏԵՂԵՐ ՀԱՇՄԱՆԴԱՄՆԵՐԻ ՀԱՄԱՐ

Գյումրու «Փյունիկ» հաշմանդամների միության 15 շահառուներ անցած երեք ամիսների ընթացքում հնարավորություն ունեցան սովորել, որից հետո նաեւ զբաղվել տրիկոտաժի արտադրությամբ: Ուսուցման կուրսն ավարտելուց հետո հաշմանդամներին տրամադրվեցին գործող մեքենաներ՝ հետագա գործունեությունը տնային պայմաններում շարունակելու համար:

Պատասխանատուների կարծիքով հաշմանդամները կկարողանան տնային պայմաններում իրենց աշխատանքով որոշ չափով լուծել սոցիալական խնդիրը: Հասարակությանն ինտեգրվելու ու գործող այլ արտադրամասում աշխատելու հնարավորություն եւս կա, միայն թե առկա է տրանսպորտի խնդիրը: Նոր մասնաշենք տեղափոխվելուց հետո պատասխանատուները փորձելու են առավել ընդլայնել հաշմանդամների զբաղվածության հարցը: «Փյունիկ» հաշմանդամներ միությանը նոր գործող մեքենաներ խոստացել են տրամադրել շվեդացիները: Հավանաբար, առաջիկա երկու ամիսների ընթացքում ավելի պարզ կդառնա հաշմանդամներին աշխատատեղով ապահովելու հեռանկարը:

Գյումրիի «Ցայգ» Հ/Ը