ՍԴ-ն Վարդգես Գասպարիի գործով որոշում է կայացրել (տեսանյութ)
Ինժեներ-գործարար, քաղաքացիական ակտիվիստ Վարդգես Գասպարիի՝ ոստիկանության աշխատակիցներին եւ դատավորին վիրավորելու գործը ենթակա է վերանայման։ Նման որոշում է օրերս կայացրել Սահմանադրական դատարանը։ «Առաջին ատյանի դատարանի որոշումը բեկանել են, նոր քննության են ուղարկել»,- «Ա1+»-ին ասաց Վարդգես Գասպարին: Սահմանադրական դատարան Վարդգես Գասպարիի պաշտպանները դիմել էին դատական մի խնդրից հետո, երբ Վերաքննիչ դատարանը բողոքը թողել էր առանց քննության՝ համարելով, որ այն ներկայացվել է ժամկետանց, վճռաբեկ դատարանն էլ բողոքի դեմ ներկայացված բողոքը վարույթ չէր ընդունել։ Իսկ բողոքը նախորդ տարվա մարտի 29-ին Շենգավիթ վարչական շրջանի ընդհանուր իրավասության դատարանի որոշման առիթով էր։ Դատավոր Նելլի Բաղդասարյանը Վարդգես Գասպարիին մեղավոր էր ճանաչել քրեական հանցագործության մեջ եւ նշանակել տուգանք 450.000 դրամի չափով: «Տուգանքը երկրորդական է, խոսքը վերաբերում է դատվածությանը: 3-4 դատվածություն ունեմ: Չգիտեմ՝ ի՞նչ է նշանակում եւս մեկը ավելանալը կամ մեկը բեկանվելը»,- ասում է ակտիվիստը: Վարդգես Գասպարին կարծում է, որ դատական համակարգում նման որոշումները պայմանավորված են արտաքին գործոններով. «Նայում են, բացի եվրոպական դատարան գնալուց, այլ հարթակներում էլ է այդ հարցերը քննարկվում, թե ինչ կարգի կամայականություններ են: Միակ բանը, որ հետաքրքրում է իշխանությանը, այն է, որ հանկարծ խոչընդոտներ չառաջանան դրսից ֆինանսական աջակցության հարցում»: Նա միաժամանակ չի կարծում, որ սրանից իշխանություններ հետեւություններ կանեն. «Իրենք զուտ սելեկտիվ կերպով կարող է ինչ- որ բան անեն՝ գլխացավանքներից ազատվելու համար»։ Ի դեպ, Վարդգես Գասպարին շարունակում է ամեն օր առավոտյան բողոքի ակցիա իրականացնել Սերժ Սարգսյանի առանձնատան մոտ՝ պահանջելով տարբեր հարցերի վերաբերյալ պատասխաններ։
