Վարչապետի առաջարկից հետո աշխատավարձերից պահե՞լ են
Կառավարությունը մոտ 11 միլիոն դրամ գումար է փոխանցել զինծառայող Գևորգ Եղիազարյանի ընտանիքի հաշվեհամարին՝ նրա բուժումն արտերկրում շարունակելու համար։ Այս մասին «Ա1+»-ին տեղեկացրեց Կառավարության մամլո խոսնակ Գոհար Պողոսյանը։ «Ա1+»-ի հարցին, թե ինչ միջոցներից է հատկացվել մոտ 11 մլն դրամ գումարը, Գոհար Պողոսյանը պատասխանեց, որ Հովիկ Աբրահամյանը իր անձանական միջոցներից ներդրում է արել։ Բացի այդ՝ եղել է վարչապետի առաջարկը նախարարներին՝ Գևորգ Եղիազարյանի հետագա բուժման ծախսերը հոգալու համար գումար հատկացնելու։ Իսկ թե նախարարություններն ի՞նչ միջոցներից են գումարներ հատկացրել, իրենք տեղեկություններ չունեն։ «Ա1+»-ի տեղեկություններով՝ զինվորին աջակցություն ցուցաբերելու նպատակով 2000-ական դրամ պահվել է նախարարությունների աշխատակիցների, իսկ 3000-ական դրամ էլ՝ բաժնի պետերի աշխատավարձից։ Հիշեցնենք, որ 2011 թ. դեկտեմբերի 27-ին վիրավորում ստացած Գևորգ Եղիազարյանի բուժումն արտերկրում շարունակելու համար անհրաժեշտ 56 000 դոլարից քաղաքացիների ջանքերով հավաքվել էր 43000-ը։
