Այսօր հայտնի կդառնան ՈՒԵՖԱ-ի չեմպիոնների լիգայի քառորդ եզրափակիչ փուլի 5-րդ եւ 6-րդ մասնակիցները: Հիշեցնենք, որ անցած շաբաթվա ընթացքում այդ իրավունքը նվաճել էին իսպանական «Բարսելոնան», իտալական «Միլանը», պորտուգալական «Բենֆիկան» եւ Կիպրոսի ԱՊՈԵԼ-ը:
Չեմպիոնների լիգայի 1/8 եզրափակիչ փուլի պատասխան խաղում այսօր գերմանական «Բավարիան» կհյուրընկալի շվեյցարական «Բազելին», իսկ իտալական «Ինտերը»` ֆրանսիական «Մարսելին»: Երկու խաղերում էլ դաշտի տերերը կձգտեն չեզոքացնել առաջին խաղում կրած 0:1 հաշվի տարբերությունը:
Մասնագետների կարծիքով «Բավարիան» բոլոր շանսերն ունի հաղթահարելու բազելյան արգելքը, քանի որ իր վերջին խաղում ցույց է տվել գերարդյունավետ խաղ` սեփական դաշտում ջախջախելով «Հոֆենհայմին»` 7:1: Սակայն շվեյցարացիների գլխավոր մարզիչ Հայկո Ֆոգելը հայտարարել է, որ «Բազելը» հարգում է «Բավարիային», բայց բոլորովին էլ չի վախենում:
«Ինտեր» - «Մարսել» հակամարտությունում, ըստ մասնագետների, ընդգծված ֆավորիտ չկա: Երկու թիմերն էլ անհաջող են հանդես գալիս իրենց ազգային առաջնություններում: Միլանցիները սեփական հարկի տակ հաղթանակ չեն տարել հունվարի 22-ից հետո, իսկ մարսելցիները Ֆրանսիայի առաջնությունում չեն կարողանում կոտրել մրցակիցների դիմադրությունը վերջին 6 հանդիպումներում:
Ի դեպ, «Ինտերը» եվրոգավաթների շրջանակում արդեն երեք անգամ ուժերը չափել է «Մարսելի» հետ, եւ բոլոր խաղերում էլ պարտություն է կրել միեւնույն 0:1 հաշվով:
Հանդիպումներն, ինչպես միշտ, կսկսվեն Երեւանի ժամանակով ժամը 23:45-ին:
