Կինոռեժիսոր Տիգրան Խզմալյանը հնարավոր է վարչական տուգանքի ենթարկվի։
Այսօր վարչական դատարանում տեղի ունեցավ նրա գործով դատավարությունը,որը տեսանկարահանել արգելվեց։
Տիգրան Խզմալյանը մեղադրվում է այս տարի ապրիլի 15-ին Մաշտոցի պուրակում կրպակների ապամոնտաժելու ակցիայի ժամանակ ոստիկաններին չենթարկվելու համար։ Ակցիային մասնակցում էին յոթ տասնյակից ավելի ակտիվիստներ։
«Ես հարց տվեցի, թե ինչու 70 հոգուց ընտրեցին միայն 4-ին, և պատասխանեցին , որ առայջն ապացուցողական կազմը պատրաստ է մեր 4-ս վերաբերյալ, մնացած գործերը դեռ սպասում են իրենց հերթին»,- ասաց Տիգրան Խզմալյանը։
Ըստ մեղադրանքի՝ ապրիլի 15-ին Տիգրան Խզմալյանն ու ապամոնտաժող խմբի ևս մեկ անդամ բարձրացել են կրպակի տանիքն ու փորձել ապամոնտաժել այն։ Հայցվոր կողմը պնդում է, որ իր այդ քայլով Տիգրան Խզմալյանը անտեսել է հասարակական կարգը չխախտելու մասին ոստիկանների պահանջը։
Հայցվոր կողմը դատարանին ներկայացրեց 3 ոստիկան վկաների, ովքեր այդ օրն իրենց ծառայությունն են իրականացրել Մաշտոցի պուրակում։
«Երկուսին ճանաչեցի, երրորդն ասում էր, թե 10 մետր հեռավորությունից հորդորում էր չխախտել օրենքը»,-ասաց նա։
Թեև դատարանում ներկայացած 3 վկաներից 2-ը չէին հիշում, թե կոնկրետ որ օրն է տեղի ունեցել միջադեպը, բայց մանրամասն ներկայացրին իրենք կողմից կատարված քայլերի հերթականությունը։
Կինոռեժիսոր Տիգրան Խզմալյանի գործով դատավարության վերջնական վճիռը դատավոր Արծրուն Միրզոյանը կհրապարակի հունիսի 12-ին։
