Կոտայքի մարզի ընդհանուր իրավասության դատարանի Հրազդանի նստավայրում շարունակվեց Վահան Խալաֆյանի սպանության գործով դատավարությունը:
Այսօր դատարանը պետք է լսեր գործով վկա, Չարենցավանի նախկին ոստիկանապետ Նորայր Հեբոյանին:
Վերջինս չէր ներկայացել դատական նիստին եւ տեղեկացրել էր, որ առողջական խնդիրներ ունի:
Նա խնդրել էր հիմք ընդունել նախաքննության ընթացքում տված ցուցմունքները: Թե տուժող, թե մեղադրող կողմը, ինչպես նաեւ ամբաստանյալներն ու նրանց փաստաբանները միջնորդեցին ապահովել Նորայր Հեբոյանի ներկայությունը դատական նիստին:
Դատավորը որոշեց կրկին անգամ հրավիրել Նորայր Հեբոյանին, իսկ չներկայանալու դեպքում` բերման ենթարկել:
Դատական հաջորդ նիստը նշանակվեց օգոստոսի 18-ին:
Ի դեպ, այսօրվա դատական նիստից հետո վիճաբանություն եւ քաշքշուկ տեղի ունեցավ ամբաստանյալների եւ Վահան Խալաֆյանի հարազատների միջեւ: Հնչեցին փոխադարձ անեծքներ:
Հիշեցնենք, որ ապրիլի 13-ին Վահան Խալաֆյանը ոստիկանություն է տարվել գողության կասկածանքով, սակայն այնտեղից դուրս է բերվել նրա դին: Խալաֆյանի սպանության գործով որպես ամբաստանյալ անցնում են 4 ոստիկան` Աշոտ Հարությունյանը, Մորես Հայրապետյանը, Գարիկ Դավթյանը եւ Գագիկ Ղազարյանը:
Լուսանկարները` Գագիկ Շամշյանի
