Երեւանի Վարչական դատարանում այսօր սկսվեց Բուզանդ 83 հասցեում բնակվող Աբրահամյանների ընտանիքի հայցի քննությունը: Ընտանիքը պահանջում է Երեւանի քաղաքապետարանի ԾԻԳ-ից սեփականաշնորհել իր մոտ 60քմ ինքնակամ կառույցը:
Նշենք, որ տան տարածքը ՀՀ Կառավարության որոշմամբ ճանաչվել է հանրային գերակա շահ, եւ այն ձեռք է բերել բենզինի ներկրմամբ զբաղվող հայտնի գործարար Բարսեղ Բեգլարյանի որդին` Հայկ Բեգլարյանը:
Տան ընդհանուր մակերեսը 137 քմ է, սակայն սեփականաշնորհված է միայն 77 քմ-ն, որի համար էլ Հայկ Բեգլարյանը պատրաստ է փոխհատուցում տալ 33 մլն դրամ:
ԾԻԳ-ի իրավաբան Գեղամ Թադեւոսյանը դատական նիստի ընթացքում հանդես եկավ հակընդդեմ հայցով` պահանջելով վտարել Բուզանդի 83 հասցեում բնակվող մարդկանց` նշելով, որ տարածքը դարձել է համայնքի սեփականություն:
Ընտանիքի շահերը ներկայացնող փաստաբան Էդգար Բադումյանն էլ դատարանից ժամանակ խնդրեց` հակընդդեմ հայցին ծանոթանալու համար: Դատավոր Արթուր Առաքելյանը բավարարեց միջնորդությունը:
Դատական հաջորդ նիստը նշանակվեց ապրիլի 12-ին` ժամը 16.00-ին:
