Ազգային ժողովի շենքի՝ Դեմիրճյան մուտքի մոտ այսօր ակտիվիստ Վարդգես Գասպարին միայնակ ակցիա էր կազմակերպել՝ հունիսի 17-ին «Հարսանաքարում» տեղի ունեցած դաժան միջադեպը քննադատելու:
Ակցիայի ժամանակ Վարդգես Գասպարիին անսպասելիորեն մոտեցավ Աժ ՀՀԿ պատգամավոր Սամվել Ալեքսանյանը և խլեց «Ռուբեն Հայրապետյան՝ Մարդասպան» բովանդակությամբ պաստառը:
Մի վայրկյան անց մոտեցավ մի երիտասարդ եւ Գասպարիին տապալեց գետնին:
Ազգային Ժողովի մուտքի մոտ գտնվող ոստիկաններից որեւէ մեկը չփորձեց միջամտել:
Վարդգես Գասպարին նույն պահին ոստիկաններից մեկին հաղորդում տվեց, այն մասին, որ իրեն օրը ցերեկով Ազգային Ժողովի մուտքի մոտ պատգամավոր Սամվել Ալեքսանյանի թիկնապահը հրել և գցել է գետնին, իսկ պատգամավորն էլ հափշտակել պաստառը։
