«Ես բռնության չեմ դիմել, ասել եմ` տուր էտ պաստառը կարդամ, աչքերս լավ չի տենում հեռվից »,- այսօր ԱԺ Դեմիրճյան փողոցի մուտքի մոտ տեղի ունեցած միջադեպի առթիվ «Ա1+ »-ի հետ զրույցում հայտարարեց գործարար պատգամավոր Սամվել Ալեքսանյանը : Արդեն տեղեկացրել ենք, որ պատգամավոր Սամվել Ալեքսանյանն այսօր խլել է «Հարսնաքարի » սեփականատեր, ՀՀԿ-ական պատգամավոր Ռուբեն Հայրապետյանի դեմ ԱԺ դարպասների մոտ բողոքի ակցիա անող Վարդգես Գասպարիի պաստառը, ով այդ պահին հարցազրույց էր տալիս «Ա1+» -ին: Իսկ պատգամավորին ուղեկցող անձը հարվածել եւ գետին է տապալել Գասպարիին : Հայտնի է, որ ոստիկանությունում նյութեր են նախապատրաստվում առկա տեսանյութի առթիվ : Մի քանի հարց ուղղեցինք պատգամավորին :
- Պարոն Ալեքսանյան, փաստորեն այսօր պատռել եք Գասպարիի պաստառը:
- Գասպարիի պաստառը ես չեմ պատռել: Ես ձեռից վերցրել եմ, ասել եմ տուր մի հատ կարդամ, աչքերս չի տենում :
- Կարդացի՞ք, ի՞նչ էր գրված վրան :
- Չհասցրի կարդալ:
- Փաստորեն Ձեր թիկնապահն էլ հարվածել է Գասպարիին :
- Ես թիկնապահ չունեմ :
- Դե, Ձեզ հետ եղող անձը :
- Իմ հետ ոչ մեկ չի եղել, ոչ մեկ :
- Լավ, ստացվում է` դուք էլ եք դիմել բռնության :
- Ես բռնության չեմ դիմել, ասել եմ` տուր էտ պաստառը կարդամ, աչքերս լավ չի տենում հեռվից :
- Գասպարին բողոք է ներկայացրել, ի՞նչ եք անելու, պատրա՞ստ եք պատասխան տալ:
- Եթե թուղթը վերցնելու, կարդալու համար բողոքել են, թող բողոքեն :
- Ախր կադրերը կան:
- Ես չեմ պատռել, թիկնապահ չունեմ, հո ձեր ասելով չի :
- Պարոն Ալեքսանյան, իսկ կարդացե՞լ եք կառավարության ծրագիրը եւ հատկապես որ դրույթներին եք այսօր կողմ քվեարկել:
- Էսօր հերիք ա, էլ չեմ խոսա :
Ճեպազրույցը` Մարինե Խառատյանի
