Մոսկվայի ժամանակով 12.00-ին միաժամանակ մեկնարկեցին 4 ակցիաներ, ընդիմության «Հանուն արդար ընտրությունների» մասնակիցների երթը, Պուտինի կողմնակիցների՝ «Մենք կորցնելու բան ունենք» ցույցը, ինչպես նաև Ռուսաստանի լիբերալ դեմոկրատական կուսակցության և «Յաբլոկո»-ի հավաքները։
Ամենամարդաշատը, ըստ «Նյուզռու»-ի ընդդիմության և իշխանամետների երթն է լինելու։
Քաղաքապետարանը երկու ճամբարների հնարավոր բախումը կանխելու համար նրանց միմյանցից բավական հեռու տարածքներ է տրամադրել։
Ընդիմության երթը սկսվել է «Բոլշայա Յակիմանկա» պողոտայից եւ ավարտվելու է «Բոլոտնիում», իսկ Պուտինի կողմնակիցներն իրենց ակցիան կանցկացնեն «Պոկլոննայա գորա»-յում։
Ընդիմության երթին միացել է նախագահի թեկնածու, միլիարդատեր Միխաիլ Պրոխորովը, որն այսօր հայտարարել է, թե որոշակի նախապայմաններից հետո ինքը պատրաստ է դառնալ վարչապետ, եթե նախագահ դառնա Վլադիմիր Պուտինը։
Ոպեսզի «ապագա վարչապետը» չսառչի՝ ընդիմության ներկայացուցիչները նրան բրդյա շարֆ են նվիրել։
Երթն ընթանում է արդարության եւ Ռուսաստանում իրավունքի գերակայության հաստատման պահանջով հագեցած պաստառներով, դրոշներով և սպիտակ փուչիկներով։
Ովքեր ցանկություն են հայտնում միանալ ընդիմության երթին, նախապես ենթարկում են մետաղորսիչ սարքի զննությանը։ Այս պահին սարքի մոտ մեծ հերթ է գոյացել,- տեղեկացնում է «Ինտերֆաքս»-ը։
Ի դեպ, մետաղորսիչ սարքը հայտնաբերել է տաք թեյով լի բազմաթիվ թերմոսներ։
Ջերմաչափն այս պահին ցույց է տալիս -19 աստիճան։
Պուտինի կողմնակիցների հավաքը էապես տարբերվում է ընդիմադիրներից։ Այստեղ ելույթներ են ունենում ռուսական շոու-բիզնեսի աստղերը։
Քիչ առաջ ավարտվեց «Դիսկոտեկա Ավարիա» խմբի ելույթը, որից հետո ելույթ ունեցավ քաղաքագետ Սերգել Կուրղինյանը։
ՌԴ վարչապետ Վլադիմիր Պուտինը ուղերձով ողջունել է իր կողմնակիցներին, կոչ անելով հանդես գալ «նարնջագույն հեղափոխության դեմ»։
«Պուշկինսկի»-ում Ժիրինովսկու հանրահավաքը տեւել է ընդամենը 25 րոպե։ Ըստ «Լենտա ռու»-ի՝ «Ժիրինովսկին չի ցանկացել ցրտահարել իր համախոհներին, հայհոյել է և նրանց տուն ուղարկել»։
Իսկ ահա «Յաբլոկո»-ն չի շտապում տուն ուղարկել ակցիայի մասնակիցներին՝ անարխիստներին, կոմունիստներին և կուսակցության հիմնական անդամներին։
