Ադրբեջանում ՏԻՄ ընտրությունների վերաբերյալ քննարկումից անմիջապես հետո Եվրոպայի խորհրդի Տեղական եւ ռեգիոնալ իշխանությունների Կոնգրեսի նիստում վաղը ելույթ կունենա Երեւանի քաղաքապետ Գագիկ Բեգլարյանը:
Նա Ստրասբուրգ կժամանի այսօր երեկոյան: Սա նրա` իր պաշտոնում առաջին այցն է ԵԽ այս կառույց: Գագիկ Բեգլարյանը պատրաստվում է խոսել Հարավային Կովկասի մայրաքաղաքների կարգավիճակի մասին:
Իսկ Տեղական եւ ռեգիոնալ իշխանությունների Կոնգրեսի 18-րդ նստաշրջանը սկսվում է այսօր` տեղական ժամանակով` ժամը 10.45-ին: Կոնգրեսի պատվիրակները ընտրելու են Կոնգրեսի գլխավոր քարտուղար` ընտրություն կատարելով երեք թեկնածուի միջեւ: Այս նստաշրջանի օրակարգում են բնապահպանական խնդիրները, ժողովրդավարությունը ՏԻՄ մակարդակում, Ադրբեջանի ՏԻՄ ընտրությունները եւ այլն:
Հայաստանյան պատվիարկությունը վաղ առավոտից մասնակցում է նիստերի: Պատվիրակությունը ղեկավարում է Էմին Երիցյանը: Ստրասբուրգում են Երեւանի ավագանու անդամ Նատալյա Լափաուրին, Նոր Երզնկայի համայնքապետ Ալինա Պողոսյանը, Իջեւանի քաղաքապետ Վարուժան Ներսիսյանը:
