Մի մրցակցին մարդակեր է համարում, մյուսին՝ բարերար (տեսանյութ)
Թիվ 7 ընտրատարածքում առաջադրված պատգամավորության թեկնածու Վարդան Վարդանյանը, իր բառերով, հավաստի տեղեկություններ ունի, որ Նիկոլ Փաշինյանն իր դեմ պատվեր է կատարում. «Սամվել Ալեքսանյանը գնել ա Նիկոլ Փաշինյանին։ Դերասանական բաներ են անում, որ ցույց տան, թե իբր Նիկոլ Փաշինյանը դուրս ա եկել Սամվել Ալեքսանյանի դեմ։ Իրականում դուրս ա եկել իմ դեմ»։
Մեծամասնական ընտրապայքարում պարոն Վարդանյանն իր շանսերը բավական բարձր է գնահատում։
Իրենից բացի՝ Վարդանյանը գաղափարական թեկնածու է համարում համարում Սամվել Ալեքսանյանին ու անգամ նրան քաղաքական բանավեճի առաջարկ է արել. «քանի որ ինքը ուներ առողջական լուրջ խնդիրներ, ես ունեի նաեւ առողջական խնդիրներ, դրա համար էլ մեր բանավեճը դեռեւս չի ստացվել»։
Չնայած Ալեքսանյանն իր դեմ պայքարում երբեմն անթույլատրելի միջոցների է դիմում, բայց Վարդանյանն իր գաղափարական հակառակորդի մասին մեծ կարծիք ունի. «Սամվել Ալեքսանյանը եղել ա մեծ բարերար, ու կա մեծ բարերար։ Սամվել Ալեքսանյանը ոչ գազան ա, ոչ էլ Նիկոլ Փաշինյանի նման մարդակեր ա, որ մարդ ուտի»։
Անկուսակցական Վարդան Վարդանյանը Երեւանի Մալաթիա-Սեբաստիա վարչական շրջանի ղեկավարի աշխատակազմում բաժնի պետի տեղակալ է։ Ընտրապայքարի մեջ է մտել, որովհետեւ ուզում է, որ ժողովուրդն ի դեմս իրեն, հզոր ու ազգանվեր պատգամավորներ ունենա։
Հիշեցնենք, որ բացի Վարդան Վարդանյանից այս ընտրատարածքում առաջադրված են Նիկոլ Փաշինյանը, Սամվել Ալեքսանյանը եւ Տիգրան Գրիգորյանը։