Գիտաժողովին հետեւեք «Ա1+»-ի եթերում
Խաչատուր Աբովյանի անվան հայկական պետական մանկավարժական համալսարանը, Մանկավարժական համալսարանի Մետափիլիսոփայության, փոխակերպական տրամաբանության և փաստարկման տեսության միջազգային գիտահետազոտական ինստիտուտը, Փիլիսոփայության միջազգային ակադեմիան և Հայոց փիլիսոփայական ակադեմիան ապրիլի 16-17-ին Երևանում կազմակերպում են միջազգային գիտաժողով' Փոխակերպվող հասարակության զարգացման տեսական և գործնական հիմնախնդիրներ (փիլիսոփայական և հոգեբանական տեսանկյուններ) թեմայով:
Միջազգային գիտաժողովին մասնակցում են եւ ելույթներով հանդես կգան խոշոր գիտնականներ Մեծ Բրիտանիայից, Ֆրանսիայից, Ավստրիայից, Դանիայից, Բելգիայից, Ֆինլանդիայից, Չեխիայից, Հունաստանից, Ռուսաստանից, Վրաստանից, Հայաստանից եւ ԼՂՀ-ից:
Լիագումար նիստում առաջին զեկույցը կներկայացնի փիլիսոփայության դոկտոր, ակադեմիկոս, Աթենքի համալսարանի պատվավոր ռեկտոր, Փիլիսոփայության միջազգային ակադեմիայի համանախագահ Եվանգելոս Մոութսոպոուլոսը: Նա կկարդա «Հավիտենական տիեզերքը և մարդու դատապարտված իրավունքը. համակերպու±մ, թե± նախաձեռնողականություն» թեմայով զեկույց:
«Արդի բազմամշակութային հասարակությունը և միջմշակութային հարաբերությունների հերմենևտիկան» կներկայացնի փիլիսոփայության պրոֆեսոր, Ինսբրուքի համալսարանի փիլիսոփայության բաժանմունքի ղեկավար, Փիլիսոփայության միջազգային ակադեմիայի համանախագահ Հանս Կոխլերը:
«Կոսմոպոլիտիզմը մեր ժամանակներում» թեման կզեկուցի Կոպենհագենի Աարուսի համալսարանի պրոֆեսոր ,Կրթության բաժանմունքի էթիկայի և իրավունքի կենտրոնի տնօրեն,Փիլիսոփայական ընկերությունների միջազգային ֆեդերացիայի (FISP) նախագահ, փիլիսոփայության XXII համաշխարհային համաժողովի (2008) նախագահ, Փիլիսոփայության միջազգային ակադեմիայի ակադեմիկոս Պիտեր Կեմպը:
Լիագումար նիստի ավարտին «Փսիխոպաթիա. առնչությունները փոխակերպվող հասարակության հետ» թեմայով զեկույցը կներկայացնի Գլազգոյի շոտլանդական համալսարանի դատակլինիկական հոգեբանության պրոֆեսոր, Հոգեբանության և իրավունքի եվրոպական ընկերակցության նախագահ Դեյվիդ Կուկը:
Դիտեք «Ա1+»-ի եթերում։