ԱԺ-Ն ՄՆԱՑ ԱՌԱՆՑ ԸՆԴԴԻՄՈՒԹՅԱՆ
Աջակցիր «Ա1+»-ինԽորհրդարանի գարնանային նստաշրջանի առաջին իսկ օրը ԱԺ ընդդիմադիր պատգամավորներն ընդունեցին քաղաքական որոշում՝ իրենց հետագա գործունեության վերաբերյալ:
«Արդարություն» եւ «Ազգային Միաբանություն» խմբակցությունների պատգամավորները այլեւս չեն մասնակցելու խորհրդարանի օրենսդիր աշխատանքին: ԱԺ նիստերի դահլիճ նրանք միայն կմտնեն հայտարարությունների եւ հարց ու պատասխանի օրերին, այսինքն՝ երեքշաբթի եւ չորեքշաբթի:
Ընդդիմադիրներն այդ կերպ քաղաքական նպատակով օգտագործելու են խորհրդարանական ամբիոնը:
Մեկնաբանելով ընդդիմադիրների որոշումը «Արդարություն» խմբակցության պատգամավոր Ալբերտ Բազեյանը նշեց, որ եթե օրենսդիր մարմինն ինքն արդեն ոտնահարում է օրենքն, ապա այդ դեպքում ընդդիմադիրներն այդ խորհրդարանում անելիքներ չունեն:
«Օրենք ոտնահարել» ասելով ընդդիմադիր պատգամավորները նկատի ունեն այն փաստը, որ խորհրդարանն այս եռօրյա աշխատանքներում հերթական անգամ չընդգրկեց «Հանրաքվեի մասին» օրենքում փոփոխություններ անելու նախագիծը:
Նախօրոք իմանալով, որ Աժ մեծամասնությունը, միեւնույնն է, թույլ չի տա, որ հարցը օրակարգ մտնի, ընդդիմադիր պատգամավորները հենց սկզբից որոշեցին չմասնակցել եւ բոյկոտել քվեարկությունը:
Արդյունքում քվեարկության ժամանակ ընդամենը 4 պատգամավոր է կողմ եղել, որ հարցը «հանրաքվեի մասին» օրենքում փոփոխությունների հարցը մտնի օրակարգ: 81 պատգամավոր այդ հարցին դեմ է արտահայտվել, իսկ 2 ձեռնպահ:
