ԹԵԼԵՊԼԱՍԸ ԶԻՋՈՒՄ Է ԻՐ ԴԻՐՔԵՐԸ
Աջակցիր «Ա1+»-ինԵրեք ամիս շարունակ դատարաններում ընթանում է քաղաքացիների հայցը` ըննդեմ Թելեպլասի եւ ԱրմենՏելի: Այսօր Հասարակության հետ կապերի Հայաստանյան Ասոցացիայի փոխնախագահ Արման Սաղաթելյանը եւ իրավաբան Դավիթ Սանդուխչյանը, որը զբաղվել է այդ դատերով, հանդիպեցին լրագրողների հետ:
«Մենք բոլոր քաղաքացիներին,ովքեր տուժել են այդ գովազդից առաջարկում էինք դիմել դատարան, մենք կարողացանք ապացուցել, որ գովազդն անբարեխիղճ է, գրգռել է անչափահասների դյուրահավատությունը եւ հայցվորին պատճառել է վնաս»,- ասում է Արման Սաղաթելյանը:
Իրավաբան Դավիթ Սանդուխչյանը ասաց, որ Թելեպլասը եւ ԱրմենՏելը հրաժարվեցին ներկայացնել իրենց միջեւ կնքված պայմանագիրը` այն համարելով գաղտնիք:
«Այս ծառայությունները մատուցվում են ոչ թե կանխիկ գումարով, այլ ապառիկ, եւ երեխան չգիտի, թե դրանից օգտվելը ինչ վնասներ է բերելու ծնողներին, եւ ծառայություններից օգտվելու գումարը ներկայացված է ոչ թե դրամով, այլ դոլլարով,ինչը նույնպես անհասկանալի է անչափահասների համար»,- ասում է Դավիթ Սանդուխչյանը:
Դատարանը բավարարել է քաղաքացի Քրիստինե Տերյանի հայցը, որի հեռախոսային պարտքը ծառայություններից օգտվելուց հետո կազմել էր 100.000 դրամ: Դատարանը գովազդը ճանաչել է անբարեխիղճ եւ նրան ազատել մուծումներ կատարելուց:
Ըստ Արման Սաղաթելյանի` իրենց ոչ վերջին տվյալներով դատարանում 20 հայց կա` ընդդեմ ԱրմենՏելի եւ Թելեպլասի:
Նա նաեւ համոզված է, որ այս դատավարությունները ավելի արագ կընթանան եւ անպայման վճիռ կկայացվի հօգուտ հայցվորի:
