• Խոստանում են ազատագրել Նախիջեւանը

    ՙԺառանգություն՚ կուսակցության ՙՀայք՚ երիտասարդական-ուսանողական միությունը հանդես է եկել  հայտարարությամբ.

    «Վերջերս հաճախակի են դարձել Ադրբեջանի ղեկավարության կողմից հնչող ռազմատենչ հայտարարություններն ու պատերազմը վերսկսելու սպառնալիքները: Այսպես’ ս.թ. նոյեմբերի 22-ին Մյունխենում Հայաստանի եւ Ադրբեջանի նախագահների հանդիպման նախօրեին Իլհամ Ալիեւը հայտարարել էր, որ եթե այս անգամ էլ ղարաբաղյան խնդրի կարգավորման ուղղությամբ առաջընթաց չգրանցվի, ապա Ադրբեջանը կդիմի հակամարտությունը ռազմական ճանապարհով լուծելու տարբերակին: Նոյեմբերի 25-ին Ադրբեջանի պաշտպանության նախարար Սաֆար Աբիեւն իր հերթին հայտարարեց, թե Ադրբեջանին այլ տարբերակ չի մնում, քան դիմել խնդրի ռազմական լուծմանը: Նման պայմաններում Լեռնային Ղարաբաղի եւ Հայաստանի հանրապետությունների առջեւ ծառացած լուրջ մարտահրավերը չտեսնելու տալը եւ միայն այն մտայնությանն ապավինելը, թե այս հայտարարություններն արվում են բացառապես քարոզչական նկատառումներով, համարում ենք խիստ վտանգավոր: 

    Մենք’ ՙԺառանգություն՚ կուսակցության երիտասարդներս, համարելով, որ խաղաղությունն անանց արժեք է եւ քաջ գիտակցելով, որ պատերազմը երկու կողմերին էլ կբերի անհամար արհավիրքներ ու բազմաթիվ զոհեր, մերժում ենք ռազմական եղանակով ցանկացած խնդրի լուծում եւ դատապարտում ենք Ադրբեջանի ղեկավարության կողմից սեփական ժողովրդին ռազմատենչ հիստերիայի մեջ ներքաշելու եւ նոր պատերազմի մղելու սադրանքը: Այդուհանդերձ, մենք գտնում ենք, որ պատերազմը կանխելու լավագույն ձեւը դրան պատրաստ լինելն է: Հայկական երկու պետություններն ու հասարակությունները ստեղծված իրավիճակում արցախյան ռազմաճակատում մարտական գործողությունների հնարավոր վերսկսմանը նախապատրաստվելու նպատակով պետք է ձեռնարկեն համարժեք արտակարգ գործողություններ:

    Մենք կոչ ենք անում.

    գ          ՀՀ Ազգային ժողովին’ անհապաղ ճանաչել Լեռնային Ղարաբաղի Հանրապետությունը’ ստեղծելով պայմաններ անհրաժեշտ պահին ՀՀ նախագահության կողմից ԼՂՀ-ի գործադիր ճանաչման, ինչպեսեւ բոլոր ոլորտներում’ ներառյալ պաշտպանության եւ անվտանգության, ՀՀ-ԼՂՀ երկկողմ միջպետական պայմանագրերի կնքման համար:

    գ          ՀՀ կառավարությանը’ վերանայել 2010թ. ՀՀ բյուջեի նախագիծը եւ վերականգնել ՀՀ ռազմական ծախսերի առնվազն 2009թ. մակարդակը, ինչպեսեւ շեշտակի ավելացնել ԼՂՀ-ին հատկացվելիք միջպետական վարկի ծավալները:

    գ          ՀՀ եւ ԼՂՀ պաշտպանության նախարարություններին’

    1. ողջ չափահաս բնակչության շրջանում կազմակերպել քաղաքացիական պաշտպանության, ինչպես նաեւ մարտական գործողություններին մասնակցելու անհրաժեշտ ունակությունների եւ հմտությունների վերապատրաստման դասընթացներ ու վարժանքներ.

    2. մշակել եւ հասարակություններին ներկայացնել ռազմական գործողությունների պայմաններում քաղաքացիական հասարակություն-բանակ փոխգործակցության գործուն ծրագիր:

    գ          ՀՀ ԱԳՆ-ին’ պաշտոնական նոտա ուղղել ՀԱՊԿ շրջանակներում ՀՀ դաշնակից եւ ռազմական գործընկեր համարվող ՌԴ ԱԳՆ-ին’ պահանջելով անհապաղ դադարեցնել Ադրբեջանին ցանկացած տեսակի ռազմական մատակարարումները եւ ռազմական համագործակցությունը, որոնք մինչ օրս իրականացվում են Մոսկվայի եւ Բաքվի միջեւ 2006թ. եւ 2008թ. կնքված համաձայնագրերի շրջանակներում կամ դրանցից դուրս:

    գ          Հայաստանի, Արցախի եւ Սփյուռքի երիտասարդությանը’ համախմբվել եւ թուլ չտալ որեւէ միակողմանի զիջում Արցախի հարցում, իսկ անհրաժեշտության դեպքում զենքը ձեռքին տեր կանգնել մեր հայրերի կռած հաղթանակներին:

    գ          ՀՀ կուսակցությունների երիտասարդական կազմակերպություններին’ հանդիպել եւ քննարկել Արցախի շուրջ ստեղծված իրավիճակը:

                Այս բոլոր գործողություններն օգտակար կլինեն անգամ այն դեպքում, եթե Ադրբեջանի ղեկավարության’ պատերազմը վերսկսելու սպառնալիքները կրում են բացառապես քարոզչական բնույթ: Հակառակ դեպքում, եթե Ադրբեջանը նոր ագրեսիա սանձազերծի ԼՂՀ-ի եւ Հայաստանի Հանրապետության դեմ’ հայկական զինված ուժերը վստահաբար կպահպանեն նախկինում կրած հաղթանակների լավագույն ավանդույթները եւ չեն սահմանափակվի միայն ինքնապաշտպանությամբ, այլ կզարգացնեն հակահարձակումը եւ կազատագրեն հայկական Գարդմանը’ ներառյալ Գանձակը, ինչպեսեւ Նախիջեւանը’ ապահովելով Հայաստանի եւ Արցախի անվտանգությանն անհրաժեշտ նոր բուֆերային գոտիներ»,-ասված է հայտարարության  մեջ:

  •