«Ո՞վ է ասում, որ վարչապետը չի կարող սխալվել»
Աջակցիր «Ա1+»-ին
«Այո, ես Սասուն Միքայելյանի հետ շատ մտերիմ եմ եղել, ունեմ նորմալ հարաբերություններ: Մասնակցել եմ նրա ծննդյան տոնին, լավ քեֆ ենք արել»,- «Ա1+»-ի հետ զրույցում ասաց ԱԺ ՀՀԿ խմբակցության քարտուղար Էդուարդ Շարմազանովը: Նա, խոնարհվելով բոլոր ազատամարտիկների առջեւ,չցանկացավ անդրադառնալ, թե Սերժ Սարգսյանի համաներումը ում վրա' ինչպես է անդրադարձել: Փոխարենը' Էդուարդ Շարմազանովը պատասխանեց «Ա1+»-ի մյուս հարցերին:
- Դուք համաներումը համարում եք Սերժ Սարգսյանի ներողամտության, մարդասիրության դրսեւորման արդյունք,մինչդեռ քաղբանտարկյալները, որոնց մի մասի վրա համաներումը տարածվեց, այդպես չեն կարծում, գտնում են, որ կիսատ ներողամտություն, կիսատ մարդասիրություն չի լինում:
- Դա քաղաքական բազմակարծության արդյունքն է: Նրանք ունեն իրենց կարծիքը, ես ունեմ իմ կարծիքը: Այո, համաներումով Սերժ Սարգսյանը ցույց տվեց, որ բոլորի նախագահն է եւ նրա խոսքը գործ է:
- Բոլորի նախագահ Սերժ Սարգսյանը ինչո՞ւ համաներում չհայտարարեց բոլոր քաղբանտարկյալների նկատմամբ:
- Կապրենք, կտեսնենք: Համաներում միայն մարտի 1-ի համար չէր:
- Ինչո՞ւ հենց այս պահին համաներում հայտարարվեց' ԵԽԽՎ նստաշրջանից առաջ:
- Մենք մտել ենք ԵԽ մեր ցանկությամբ, որովհետեւ ընտրել ենք ժողովրդավարական ուղին: Համաներումը ԵԽ-ի հետ կապ չունի: Սերժ Սարգսյանը համաներում հայտարարեց, քանի որ դրա հասարակական պահանջը կար, նրան դիմեցին քաղաքական ուժերն ու հասարակական կազմակերպությունները:
- Սերժ Սարգսյանն իր լիազորություններից օգտվելու' համաներում հայտարարելու համար, ինչո՞ւ էր սպասում քաղաքական ուժերին, հ/կ-ի խնդրանքին կամ պահանջին:
- Նա մշտապես կառքի ունի հասարակության տեսակետը ավելի լավ իմանալու:
- Ձեր կարծիքով' ընտրված նախագահը տեղյակ չի՞ լինում իր հասարակության պահանջներին, ստուգելու կարիք ունի՞:
- Այն, որ Սերժ Սարգսյանը ընտրված նախագահ է, վկայում են եւ ընտրությունների արդյունքները, եւ ՍԴ-ի որոշումը եւ միջազգային կառույցները: Հանրապետության նախագահը սխալվելու կարիք չունի եւ միշտ պետք է տեղյակ լինի հասարակության տեսակետներին: Ես անընդհատ շփվում եմ մեր հասարակության հետ, մեր ժողովրդի հետ եւ շատ լավ գիտեմ նրանց բոլոր խնդիրները:
- Այդ դեպքում, Ձեր կարծիքով, ո՞րն է մեր ժողովրդի ամենաառաջնային խնդիրը:
- Տնտեսական ճգնաժամի պարագայում ամենաառաջնային խնդիրը սոցիալականն է:
- Պարոն Շարմազանով, ինչպե՞ս եք գնահատում այն փաստը, որ վարչապետ Տիգրան Սարգսյանը նա երկար ժամանակ պնդում էր, որ ՀՀ-ում տնտեսական ճգնաժամ չկա, իսկ օրերս կառավարության անդամներին խստիվ արգելել է ամռան ընթացքում մեկ ամսով արձակուրդ գնալ եւ հատկապես բացակայել Հայաստանից' ասելով, ի՞նչ է կարծում եք, թե տնտեսական ճգնաժամն ավարտվել է:
- Հանրապետության վարչապետը հետեւողական է: Եկեք լուրջ չքննադատենք: Բոլոր մարդիկ էլ սխալական են, իսկ ո՞վ է ասում, որ վարչապետը չի կարող սխալվել: Շատ կարեւոր է, որ վարչապետը Տիգրան Սարգսյանը զգում է խնդրի լրջությունը եւ ամբողջ կառավարությունը պետք է աշխատի այդ ուղղությամբ:
- Պարոն Շարմազանով, Երեւանի ավագանու ընտրություններն արդեն ավարտվել են, Դուք գո՞հ եք ընտրությունների ընթացքից եւ արդյունքներից:
- Այո գոհ եմ եւ ոչ միայն նրա համար, որ ՀՀԿ-ն հաղթեց, այլեւ բոլոր ուժերը հնարավորություն ունեցան քարոզարշավի ընթացքում ներկայացնել իրենց տեսակետները: Իհարկե, կան նաեւ թերություններ, սակայն այս ընտրություններով, մենք ցույց տվեցինք, որ կարող ենք նորմալ ընտրություններ անցկացնել:
- Պարոն Շարմազանով, այս ընտրություններում բոլոր բախումները, այդ թվում' դանակահարություն, ծեծուջարդ տեղի ունեցավ ՀՀԿ-ի եւ ԲՀԿ-ի միջեւ: Ինչո՞վ էր դա պայմանավորված:
- Ընտրությունների ընթացքում թաղերում պայքարն ավելի է թեժանում, սակայն ես չեմ կարծում, որ դա լուրջ տարաձայնություններ էին ՀՀԿ-ի եւ ԲՀԿ-ի միջեւ: Բայց այն, որ մրցապայքարը գնում էր ԲԿՀ-ի եւ ՀՀԿ-ի միջեւ, արձանագրվեց նաեւ ընտրությունների արդյունքներում:
- Ձեր կարծիքով ընտրակեղծիք կատարել, ընտրակաշառք բաժանելը ծանր հանցագործություն չէ՞:
- Ինձ համար հանցագործություն են բոլոր այն բաները, որոնք չեն համապատասխանում ՀՀ Սահմանադրությանն ու օրենքներին: Ես գտնում եմ, որ ընտրական մեխանիզմները մեր երկրում դեռ պետք է զարգանան: ԵԽ մոնիտորինգի հանձնաժողովը նույնպես գտնում է, որ մեր Ընտրական Օրենսգիրքն է պետք է բարեփոխումների ենթարկվի:
- Այսինքն, կրկին ԸՕ-ն է մեղավո՞ր: Որեւէ, մեկը այսօր չի հերքում, որ ՀՀ-ում ամենաարդար եւ ազատ ընտրությունները տեղի են ունեցել 1991թ. Խորհրդային Միության ԸՕ-ով: Դա ինչպե՞ս կբացատրեք:
- Այո, լավագույն օրենսդրությունը կարելի է կեղծել, վատագույն օրենսդրությամբ կարելի է շատ լավ ընտրություններ կազմակերպել:
- Ովքե՞ր են Երեւանի քաղաքապետի ընտրությունների կեղծիքների, բռնությունների պատասխանատուն:
- Պատասխանատու բոլորս ենք:
- Ինչպե՞ս եք գնահատում այն փաստը, որ համաներումը տարածվեց նաեւ ընտրակեղծիքներ կատարածների վրա, մինչդեռ 2006թ. համաներման տեքստում առանձին տողով նշված էր, որ համաներումը չի տարածվում ընտրակեղծարարների վրա:
- Այս համաներումը մեր պատմության մեջ աննախադեպ էր,մարդասիրական կարելի է անվանել, որովհետեւ 2000 մարդու վրա է ազդում, եւ այն մարտի 1-ի համար չէր: Միաժամանակ ես այն կարծիքին չեմ, որ մենք փակել ենք մարտի 1-ի էջը:
- Ձեր կարծիքով' ի՞նչ պետք է անել մարտի 1-ի էջը փակելու համար:
- Փոխադարձ վստահություն, հանդուրժողականություն:
- Մարտի 1-ի դեպքերը, 10 սպանությունները բացահայտել պետք չէ՞:
- Իհարկե, պետք է:
- Ձեզ դատավարությունները բավարարեցի՞ն:
- Ես իրավաբան չեմ,բայց մենք պետք է շարժվենք առաջ: Մենք պետք է կարողանանք ընդդիմություն-իշխանություն հարաբերությունները օգտագործել ի շահ Հայաստանի: Մենք բոլորս մի նավի անդամներ ենք:
Հարցազրույցը վարեց Վիկտորյա Աբրահամյանը