Սերժ Սարգսյանը իմպուլսի կարիք ունի՞

Աջակցիր «Ա1+»-ին

«Սերժ Սարգսյանի համաներումը Եվրոպայի ականջի, Եվրոպայի աչքի համար է»,- համոզված է իրավապաշտպան Վարդան Հարությունյանը:
«Ա1+»-ի հետ հարցազրույցում նա նաեւ վստահեցրեց, որ պատահական չի ընտրված համաներման ժամկետը` ԵԽԽՎ ամառային նստաշրջանից հետո:

- Հենց սկզբից էլ իշխանությունները նպատակ չունեին համաներում անցկացնել: Նրանք կարծում էին, որ եվրոպացիները կբավարարվեին համաներման մասին խոսակցություններով, սակայն գործող իշխանությունները ստիպված եղան շրջանառության մեջ փաստաթուղթ դնել: Երեւի դա նրանցից պահանջվել է:

- Ինչպե՞ս եք գնահատում համաներման անցկացման շուրջ ընթացող գործընթացը, գաղտնիությունը:

- Ես կարծում եմ ավելի ճիշտ է խոսել ոչ թե այդ գործընթացի, փաստաթղթի գաղտնիության, այլ համաներման շուրջ ընթացող աժիոտաժի մասին, որը շատ ավելի աննորմալ երեւույթ է: Համաներումը ՀՀ նախագահի իրավասությունների մեջ մտնող գործառույթ է, եւ եթե նա համաներում հայտարարելու ցանկություն ուներ, ապա առանց որեւէ մեկի խնդրանքի կարող էր անել:

- Ի՞նչ նկատի ունեք`ասելով «աննորմալ աժիոտաժ»:

- Աննորմալ երեւույթ է, քանի որ Հանրապետության նախագահը կարիք ունի, որ տարբեր ուժեր, հասարակական կազմակերպություններ իրեն խնդրեն, որպեսզի նա համաներում անցկացնի: Դա նշանակում է, որ երկրի նախագահն իրեն լիարժեք նախագահ չի զգում`լրացուցիչ իմպուլսների կարիք ունի: Երկրորդ` հաստատվում է այն միտքը, որ Սերժ Սարգսյանին անհրաժեշտ էր, որ համաներման մասին աղմուկ բարձրանա եւ այն հասնի Եվրոպա: Նրա համար ավելի շատ ոչ թե համաներումն է կարևոր, այլ միտքը, սակայն ստիպված այն պետք է կատարարի:

- Դուք այլ ենթատեքստ չե՞ք տեսնում համաներման տակ: Օրինակ, որ մարտի 1-ի դեպքերի առիթով բոլոր ձերբակալվածները հանցագործներ էին, անկախ նրանից նրանք ընդունում են իրենց մեղքը, թե ոչ, իսկ Սերժ Սարգսյանը նրանց մեծահոգաբար ներեց:

- ՀՀ-ում չկա որեւէ մեկը, եթե հոգեկան հիվանդ չէ, իսկ Սերժ Սարգսյանը, դատախազները, իշխանության մյուս ներկայացուցիչները հիվանդ չեն, եւ բոլորն էլ տեղյակ են, որ որեւէ մեկը հանցագործություն չի կատարել: Նրանք իրենք են սարքել այդ գործերը եւ շատ լավ գիտեն, թե ինչպես են սարքվել քաղբանտարկյալների գործերը, եւ ով ինչի համար է հայտնվել անազատության մեջ: Նրանք փայլուն գիտեն, որ բանտեր են տարել իրենց քաղաքական հակառակորդներին, որոնք որեւէ անօրեն քայլ չեն արել:

- Իշխանություններն անընդհատ հայտարարում են, որ համաներումը չի հայտարարվելու մարտի 1-ի դեպքերին առչնվողների համար: Ձեր կարծիքով, ո՞րն է համաներման հիմնական նպատակը:

- Ակնհայտ է, որ համաներման առանցքում Մարտի 1-ն է, եւ եվրոպական ճնշումներն են: Ես չեմ հիշում, որ երբեւէ եվրոպական կառույցները ճնշումներ գործադրեին համաներման համար: Այդ ճնշումները դեռ կշարունակվեն, եթե բոլոր քաղբանտարկյալներն ազատ չարձակվեն:

- Կարելի՞ է ասել, որ համաներումը Քր. Դատ. Օր. 225 եւ 300 հոդվածների փոփոխության շարունակությունն է, քանի որ եվրոպացիները հույս ունեին, որ այդ փոփոխության արդյունքում ազատ կարձակվեն քաղաքական հայացքների համար ազատազրկվածները:

- Այսօր էլ մեր իշխանությունները փորձելու են խուսանավել, հնարավորինս շատ մարդ պահել ազատազրկման վայրերում, սակայն այս իշխանությունները կարող դիմակայել Հայաստանի ներսում եղած ցանկացած ուժի, ցանկացած ճնշման, բայց չեն կարող դիմակայել Եվրոպական կառույցների ճնշումներին: Դա պատճառը, որ հունվարին ՀՀ իշխանություններն ազատ արձակեցին բազմաթիվ հանցագործների եւ նրանց շարքում մի քանի քաղբանտարկյալների եւ Հայաստանի հարցի քննարկում ԵԽԽՎ-ում ձգեցին մինչեւ գարնանային նստաշրջան: Հիմա նրանք փորձելու են այս համաներմամբ քաղբանտարկյալների ազատումը ձգձգել: Ես չգիտեմ, թե ինչ հաջողություն կգրանցեն Հայաստանի իշխանությունները, ինչ հաջողություն կգրանցի Եվրոպան, սակայն այսօր ՀՀ իշխանությունների վերին օղակները մտածում են ոչ թե ՀՀ արտաքին եւ ներքին քաղաքականության ոլորտներում ինչ անեն, այլ բոլորի ուղեղները լարված են, թե ինչ անեն, որ բանտերում 3 մարդ, 5 մարդ ավել պահեն:

- Փաստն այն է, որ համաներումը ի կատար չի ածվի մինչեւ ԵԽԽՎ ամառային նստաշրջանը: Ի՞նչ եք կարծում` համաներման հեղինակը հաշվի՞ էր առել այս հանգամանքը:

- Իհարկե, հաշվի է առնված: Ամեն ինչ արվում է համաժողովին ընդառաջ: Վեհաժողովից հետո իշխանությունների ձեռքերն ազատություն կստանան: Այսօր ամեն ինչ արվում է Եվրոպայի աչքի, Եվրոպայի ականջների համար, եւ երբ այդ աչքերն ու ականջները սեւեռված չեն լինում Հայաստանի վրա, պատկերը բոլորովին այլ է լինում:

- Ազատազրկված ընդդիմության ակտիվ ներկայացուցիչների նկատմամբ դեռ դատավճիռները չեն հրապարակվել, սակայն մեղադրող կողմը պատիժ է պահանջել 5 տարուց ավելի ազատազրկում:Ի՞նչ եք կարծում` նրանց վրա համաներումը կտարածվի՞, ազատության մեջ կհայտնվե՞ն:

- Այսօր իշխանությունները բավարարվում են միայն համաներման տեքստի հրապարակմամբ եւ այն ԱԺ-ին հանձնելով: Ամբողջ սեւ գործը արվելու է ԵԽԽՎ նստաշրջանից հետո, եւ նրանք ամեն ինչ անելու են, որ հնարավորինս շատ մարդ մնա բանտերում: Ես չեմ կարող ասել` այն «7-ի գործով» մեղադրվողների վրա կազդի՞, թե՞ ոչ: Ընդհանարապես` «7»-ը սիմվոլիկ է , ես որպես իրավապաշտպան «7-ի» մեջ տեսնում եմ բոլոր քաղբանտարկյալներին` 200 -ին, հետախուզման մեջ գտնվողներին:

- Ձեր կարծիքով, ի՞նչ է պատճառը, որ քաղբանտարկյալներին շարունակում են պահել անազատության մեջ:

- Պատճառը` իշխանությունների ներքին չարությունը: Նույնիսկ հաղթանակ գրանցելու պարագայում, այս իշխանությունները ի վիճակի չեն ազատվել իրենց ներսում կուտակված մաղձից, թույնից չարությունից:

- Բոլորն են ասում, որ համաներումը Աստվածահաճո, բարի գործ է, դուք այսօր տեսնո՞ւմ եք այդ հատկանիշները:

- Եթե ներում ես մեղավորին, դա Աստվածահաճո գործ է, իսկ եթե անմեղին բանտ ես նետում, իսկ հետո նրան ներելու անվան տակ բաց ես թողնում, դա արդեն սատանայից է գալիս:

- Չե՞ք կարծում, որ բացի ներքին չարությունից, իշխանությունները ընդդիմության ամենաակտիվ ներկայացուցիչներին շարունակում են պահել անազատության մեջ քանի որ վախենում են, որ համաժողովրդական շարժումը կարող է նոր թափ առնել` նրանց ազատության պարագայում:

- Նրանք բանտ են տարել մեր հասարակության լավագույն հատվածի մի մասին: Մեր ակտիվությունը պետք չի պայմանավորել անազատության մեջ գտնվողներով: Մեր հասարակության ամենաակտիվ հատվածը 500 հազար է, որին մենք ականատես ենք եղել:
- Այդ դեպքում ի՞նչ սկզբունքով են իշխանություններն ընտրել քաղբանտարկյալներին:

- Ես չեմ կարող ասել, դա լուրջ ուսումնասիրության առարկա է: Ես իրավապաշտպան եմ, այդ հարցին կարող են պատասխան տալ հոգեբույժները, տարբեր բժիշկներ` համատեղ աշխատանքի արդյունքում:

Հարցազրույցը` Վիկտորյա Աբրահամյանի