Փաստահավաք խումբը չդիմացավ գայթակղությունների՞ն

Աջակցիր «Ա1+»-ին

«Որեւէ մեկը չի կարող ասել, որ մեր հանձնաժողովը պարապուրդի մատնված է եղել»,- գտնում է Մարտի 1-2 դեպքերն ուսումնասիրող Աժ ժամանակավոր հանձնաժողովի նախագահ, ԱԺ փոխնագահ Սամվել Նիկոյանը: «Ա1+»-ի հետ զրույցում նա ամփոփեց նաեւ իր գլխավորած հանձնաժողովի մեկամյա գործունեությունը:

- Պարոն Նիկոյան, Ձեր հանձնաժողովը պատրաստվո՞ւմ է հանդես գալ եզրափակիչ զեկույցով: Այսինքն` Մարտի 1-2 դեպքերն ուսումնասիրող Աժ ժամանակավոր հանձնաժողովն ավարտո՞ւմ է իր գործունեությունը, բացահայտե՞ց մարտի 1-ի դեպքերը:

- Ես պարբերաբար դիմել եմ հասարակական, քաղաքական կազմակերպություններին, իրավապաշտպաններին, անհատ քաղաքացիներին, վկաներին, բոլորին, ովքեր հնարավորություն ունեն օգնել հանձնաժողովին: Հանձնաժողովի աշխատանքները կտեսնենք մեր վերջնական զեկույցում:
- Ձեր կարծիքով ինչո՞ւ Սերժ Սարգսյանը դադարեցրեց փաստահավաք խմբի գործունեությունը, այն դեպքում, երբ խմբի անդամներից ոմանք վստահեցնում էին, որ մոտ էին մարտի 1-ի դեքերի լիարժեք բացահայտմանը:
- Կարծում եմ, որ փաստահավաք խմբի ներսի մթնոլորտը անհնարին էր դարձրել այդ խմբի գործունեությունը:
- Իսկ ինչո՞ւ էր նման մթնոլորտ ստեղծվել, բոլորը հավաքվել էին մեկ հարցի շուրջ` բացահայտելու մարտի 1-ի դեպքերը կազմակերպողներին եւ կատարողներին:
- Այդ խնդրի լուծումը տարբեր մարդիկ տարբեր կերպ են պատկերացնում: Ցավոք, փաստահավաք խմբում յուրաքանչյուրը չզգաց այն պատասխանատվությունը, որ դրված էր իրենց վրա, որ որոշ հարցերում կարող են քայլեր կատարել, որ իրենց կուսակցություններին կամ ղեկավարների դուր չգա: Եթե յուրաքանչյուրն այնպես աներ, որ դուր գար իրեն նշանակողին, ապա իրավիճակը պետք է լիներ այնպիսին, ինչպիսին էր փաստահավաք խմբում: Ես կարծում եմ, որ Փաստահավաք խումբը պետք է այն ինֆորմացիան չտրամադրեր մամուլին:
- Ի՞նչ ինֆորմացիա նկատի ունեք:
- Մարտի 1-ի զոհերից սպա Համլետ Թադեւոսյանի մահվան հանգամանքների ուսումնասիրության հետ կապված: Խնդիրն այն չէ, թե այդ ինֆորմացիան որքանո՞վ էր հավաստի կամ ոչ հավաստի: Խնդիրն այն է, որ այդ ինֆորմացիայի վրա պետք է աշխատեր հանձնաժողովը, սակայն այդ ինֆորմացիան ուղարկեցին հանձնաժողովին եւ զուգահեռ` մամուլ: Կարծում եմ` փաստահավաք խումբը ճիշտ չարեց, քանի որ դա դեմ էր խմբի կարգավիճակին: Փաստահավաք խումբն իր արդյունքները դարձնում էր հանրահավաքային, հրապարակային քննարկման առարկա, այնինչ իրենք մասնագետներ էին եւ կարող էին բավականին լուրջ աշխատանքներ իրականացնել, եթե զերծ մնային գայթակղությունից:
- Ձեր կարծիքով` Փաստահավաք խումբն այսօր չի գործում այն պատճառով, որ իր ձեռք բերած նյութերը հանրության սեփականությո՞ւնն է դարձրել:
- Նաեւ, բայց ես չասեցի, որ միակ պատճառն այդ էր: Հիմնական պատճառը փաստահավաք խմբի մթնոլորտն էր: Այնտեղ նույնիսկ մեկը մյուսի հասցեին սպառնալիքներ կարող էին հնչեցնել: Այդ միջավայրում անհնարին էր աշխատել:
- Վերադառնանք Ձեր գլխավորած հանձնաժողովի աշխատանքներին: Ձեզ մոտ ամեն ինչ հա՞րթ է:
- Մեր հանձնաժողովում էլ վիճաբանություններ, բախումներ եղել են, սակայն ես հասկացել եմ, որ ամեն դեպքում պետք է հանձնաժողովի յուրաքանչյուր անդամի հնարավորություն տալ իրենց տեսակետը հայտնելու, հարցերն ուղղելու համար: Մեր աշխատանքներն հրապարակային են եղել, եւ բոլորը մամուլով արտահայտվել են: Ամեն դեպքում մենք զերծ ենք մնացել գլոբալ բախումներից, որը կարող էր լուծարման բերել հանձնաժողովին:
- Ո՞րն է Ձեր հանձնաժողովի ամենամեծ ձեռքբերումն այս մեկ տարվա ընթացքում:
- Շատ մանրակրկիտ, համակողմանիորեն ուսումնասիրված են մարտի 1-ի առավոտյան դեպքերը: Մենք այդ հարցին այնպես ենք մոտեցել, որ երբ զեկույցը հրապարակվի, համոզված եմ` հանրության մեծամասնությունն իր հոգում կզգա, որ մենք ճիշտ ենք ասում:
- Պարոն Նիկոյան, այդ դեպքում ի՞նչ եք կարծում` մարտի 1-ին Մյասնիկյանի արձանի մոտ եւ հարակից տարածքում տեղի ունեցածը մարտի 1-ին առավոտյան Ազատության հրապարակում տեղի ունեցածի տրամաբանական շարունակությունը չէ՞:
- Իհարկե, իրադարձությունների կապը կա, բայց ամբողջությամբ այլ հարթությունների մեջ է: Օրինակ` եթե մարտի 1-ի առավոտյան կար ոստիկանների կազմակերպված, պլանավորած գործողություն, ապա երեկոյան` Ֆրանսիական դեսպանատան մոտ ես չեմ տեսել ոստիկանության կազմակերպված գործողություններ: Ավելի շատ ես տեսնում եմ իրավիճակային լուծումներ, եւ ոստիկանությունը իր թվական կազմով որքան փորձել է աճել, միշտ հետ է եկել ցուցարարների թվի աճին եւ երբեք էլ չի կարողացել ունենալ բավարար քանակի ուժեր` նման ցույցի դեմ կոնկրետ քայլեր իրականացնելու համար: Դրա համար էլ այդ ցույցը ձգվել է մինչեւ արտակարգ իրավիճակի հայտարարումը:
- Ձեր հանձնաժողովը լսել է նաեւ մարտի 1-ի 10 զոհերից մի քանիսի հարազատներին: Մարտի 1-ի սպանությունների բացահայտման գործում ինչպե՞ս եք գնահատում մեր հանձնաժողովի աշխատանքները: Ձեզ չհաջողվե՞ց պարզել, թե ոստիկաններից ով ում է սպանել` գոնե «Չերյոմուխա 7»-ով: Դա ինչպե՞ս եք գնահատում:
- Շատ վատ եմ վերաբերում: Դա առաջին հերթին նախաքննության մարմնի խնդիրն է: Այն ֆունկցիաները, որոնք ունի նախաքննության մարմինը, ո'չ Փաստահավաք խումբն ուներ եւ ո'չ էլ մեր հանձնաժողովն ունի: Այդ գործիքներն ունի նախաքննության մարմինը: Քրեական գործը կա, շարունակվում է, հույս ունենաք, որ մի օր կունենանք այդ տվյալները:
- Այսինքն` գտնում եք, որ նախաքննության մարմինը կարո՞ղ է բացահայտել սպանությունները:
- Որ միայն նախաքննության մարմինը կարո՞ղ է: Օրինակ, եթե քաղաքացիները` մարտի 1-ին այդ սպանությունների ականատեսները, գային հանձնաժողով, ասեին, թե ինչ են տեսել, կբացահայտվեր:
- Դա հնարավոր համարո՞ւմ եք: Վստա՞հ եք, որ տեսնողներ եղել են, թե ով ում է սպանել:
- Իսկ Ձեր կարծիքով, չե՞ն եղել, Ձեր կարծիքով հազարավոր մարդկանց մեջ դա գաղտնի՞ է եղել:
- Այդ դեպքում ականատեսներն ինչո՞ւ չեն գալիս եւ գոնե Ձեր հանձնաժողովում վկայություն տալիս:
- Ես չգիտեմ, Դուք տվեք պատասխանը:
- Ե՞րբ է հրապարակվելու Ձեր ամփոփիչ զեկույցը:
- Մենք մինչեւ սեպտեմբեր ժամանակ ունենք հրապարակելու մեր զեկույցը, սակայն կարծում եմ, որ մինչեւ հաջորդ ամսվա վերջ այդ կլինի:
- Ձեր զեկույցում ընդգրկե՞լու եք Փաստահավաք խմբի ձեռք բերած նյութերը, թե՞ դրանք կկորեն:
- Ոչ, չեն կորելու:
- Պարոն Նիկոյան, իսկ Սերժ Սարգսյանը համաներում պատրաստվո՞ւմ է հայտարարել, թե՞ համաներման մասին լուրերը որպես լուր էլ կմնան: Հնարավոր համաներումը կարո՞ղ է իրավիճակ փոխել մեր երկրում:
- Համաներումը լայն է լինելու եւ մի մասով է առնչվելու մարտի 1-ի դեպքերին: Անկախ նրանից, թե ինչ ուժեր կխոսեն համաներման մասին, դրանք զուտ բարի ցանկություններ են: Համաներումը ՀՀ Նախագահի սահմանադրական իրավունք է: Թե ի՞նչ տեսք է ունենալու համաներումը, ի՞նչ հոդվածներով մեղադրվողների կամ քանի՞ տարով դատապարտվածների վրա է տարածվելու, դա կախված է միայն ՀՀ նախագահի հրամանագրից եւ ԱԺ-ի քննարկումներից:

Հարցազրույցը վարեց Վիկտորյա Աբրահամյանը