ԱՐԱՐՍՏՈՒՄ ՁԵՐԲԱԿԱԼՎԱԾՆԵՐԻ ԹԻՎԸ ԱՆՑՆՈՒՄ Է 60-ԻՑ
Աջակցիր «Ա1+»-ինԱրարատի մարզում ձերբակալվածների ընդհանուր թիվը անցել է մոտ 60-ը: Միայն Արտաշատ քաղաքում ձերբակալվել է ավելի քան 15 մարդ:
Արտաշատում Ստեփան Դեմիրճյանի շտաբի պետ Արամայիս Բարսեղյանը մեզ հայտնեց, որ ձերբակալությունների մասին առաջին ահազանգը ստացել է առավոտյան ժամը յոթին: Այնուհետեւ ահազանգերը հետեւել են մեկը մյուսին: Արեւշատ, Մոշավան, Բաղրամյան գյուղերից եւ Մասիսի տարածաշրջանից ահազանգել են ձերբակալվածների հարազատները եւ Ստեփան Դեմիրճյանի շտաբի աշխատակիցները:
Արամայիս Բարսեղյանը անուն առ անուն թվեց բոլոր ձերբակալվածների անունները: Ձերբակալվածների մեջ շատ էին հատկապես վարորդները, որոնցից մեկին ծեծի ենթարկելուց եւ ահաբեկելուց հետո ազատ են արձակել:
Արամայիս Բարսեղյանի ասելով, վարորդներին ահաբեկում են, որպեսզի նրանք չհամարձակվեն կիրակի օրը կայանալիք հանրահավաքին գյուղերից մարդ տեղափոխեն:
Ի դեպ, ձերբակալելու իրավունքը տրված է եւ ՆԳ եւ ԱԱ մարմիններին: Պրն Բարսեղյանը պարզաբանություն ստանալու համար դիմել է Արարատի մարզպետ Ալիկ Սարգսյանին, սակայն մարզպետը հայտարարել է, որ տեղեկություն չունի ձերբակալությունների մասին: Ստեփան Դեմիրճյանի շտաբի պետը մեկ ժամ ժամանակ է տվել մարզպետին` ձերբակալվածների հարազատներին տեղեկություւն տալու համար:
Ալիկ Սարգսյանի պատասխանն ակնկալելու հույսով արտաշատցիների մոտ 200 հոգանոց խումբ երթ կազմակերպեց դեպի մարզպետարան: Այստեղ նրանց սպասում էր պահակախումբ: Շենք ներթափանցելու որեւէ հնարավորություն չկար:
Սակայն երկար բանակցություններից հետո, Ալիկ Սարգսյանին մոտիկից տեսնելու հնարավորություն ստացան երկու լրագրողներ եւ Արամայիս Բարսեղյանը: Վերջինիս պահանջը, որ ինքը մարզպետի մոտ կմտնի միայն լրագրողների հետ` մերժվեց: Արարատի Մարզպետ Ալիկ Սարգսյանը սկզբում նրան ընդունեց եւ միայն կես ժամ անց ընդունեց լրագրողներիս:
Մարզպետը բառացիորեն կրկնեց, որ ինքը անտեղյակ է եղելությունից, կապ չունի ձերբակալությունների հետ, ու թեեւ ինքը մարզպետ է եւ պաշտպանում է արտաշատցիների շահերը, սակայն իրավապահ մարմինների գործողություններին միջամտելու իրավունք չունի:
