«ԱՀԿ-ԻՆ ԱՆԴԱՄԱԿՑՈՒՄԸ ԼՈՒՐՋ ՀԱՂԹԱՆԱԿ Է»
Աջակցիր «Ա1+»-ին«Հայաստանն ունի իր տնտեսական քաղաքականությունը, եւ մեր երկրի անդամակցումը Առեւտրի համաշխարհային կազմակերպությանը հենց այդ քաղաքականության շրջանակներում է», - այսօր հայտարարեց ՀՀ Առեւտրի եվ տնտեսական զարգացման նախարար Կարեն Ճշմարիտյանը:
Նա համոզված է, որ այս կառույցին անդամակցությունը «մեր երկրի համար մուտք կապահովի կանխատեսելի ապագայով մի աշխարհ, որը գնում է դեպի գլոբալիզացիա, տնտեսական ինտեգրացիա եւ առեւտրի ազատականացում»:
Թեեւ «մուտք դեպի այդ աշխարհ» սահմանակից Թուրքիայով ակնկալելն ավելորդ է: Թուրքիան հայտարարել է, որ ինքը չի պատրաստվում Հայաստանի համար «առավելագույն բարենպաստ ռեժիմ ապահովել»:
Այս հարցում ԱՀԿ ղեկավարությունը Հայաստանին ոչնչով չի կարող օգնել: Ըստ նախարարի, այս կազմակերպության անդամ լինելը մեր երկրի վարկը 50 տոկոսով բարձրացնում է:
«Հայաստանով արդեն հետաքրքրվում են «Պեպսի Կոլա», «Ջեներալ մոտորս» ընկերությունները»,- ասում է Կարեն Ճշմարիտյանը:
Բայց ավելի կարեւոր նախարարը համարում է այն, որ Հայաստանում կգրանցվի 1-4 տոկոս տնտեսական աճ` «ներդրումների աճի, արտահանման ծավալների ավելացման շնորհիվ»:
Ի դեպ, նրանց համար, ովքեր կասկածում են, «որ սա լուրջ հաղթանակ է», պարոն նախարարը պատրաստ է սեմինարներ կազմակերպել:
Կարեն Ճշմարիտյանը ավելորդ չհամարեց հիշել նաեւ Օսկար Բենդերի խոսքերը. «Մարդիկ ամենից շատ վախենում են անհասկանալի բաներից»: