«Քոչարյանը պատրաստ է անգամ Հանրայինը գնել».Մեսրոպ Մովսեսյան
Հեռուստացույց միացնելուց ամեն մեկը փորձում է գտնել «իր լուրերը»։ 2002թ-ի ապրիլի 2-ից շատերի համար դժվարացավ այդ ընտրությունը, քանի որ ՀՌԱՀ-ը եթերազրկեց «Ա1+» հեռուստաընկերությունը։ «Թույլիկ» համարվեց ծրագիրը մի հեռուստաընկերության, որը լուսաբանել էր 1998թ նախագահի ընտրությունների կեղծիքները, 1999թ Հոկտեմբերի 27-ն ու հետագա զարգացումները, 2001թ Պողոս Պողոսյանի սպանությունը՝ «Բարեւ Ռոբ» արտահայտության համար եւ այլն։ Այդ ժամանակ երկիրը ղեկավարող Ռոբերտ Քոչարյանն անգամ չէր թաքցնում, որ «Ա1+»-ը խանգարում է իրեն եւ առավել քան երբեւէ խանգարելու է իրեն հաջորդ տարի կայանալիք ընտրություններում, երբ ինքը ցանկանում էր մնալ Նախագահի աթոռին։ «Ա1+»-ին փակելով՝ «փակում էին» հեռարձակող մյուս լրատվամիջոցների բերանը, որոնք դժվար թե խոսեին անօրինությունների մասին՝ եթերազրկման փաստն աչքի տակ ունենալով։ Հնարքն աշխատեց, հեռուստաընկերությունները դարձան պատասխանատու եւ հնազանդ, բայց «Ա1+»-ին լռեցնել չհաջողվեց։ Եթեր չկար, բայց ընկերությունը գտավ այլ հարթակներ՝ ներկայացնելու այն ամենը, ինչի մասին չէին խոսում մյուսները. ներկայացրեց ընտրական խախտումները, լուսաբանեց կեղծիքների հետ չհամակերպվող ընդդիմության բազմահազարանոց հանրահավաքները, Մարտի 1-ի դեպքերը, թավշյա հեղափոխությունը։ Ընդ որում՝ 2018թ ոչ բռնի հեղափոխության առաջին իսկ օրերից «Ա1+»-ը ռեպորտաժներ էր պատրաստում «Արմնյուզ» ՀԸ-ով հեռարձակվող «Այբ-Ֆե+» հաղորդաշարի համար, երբ մնացած ալիքները խուսափում էին անգամ մեկ բառ ասել Սերժ Սարգսյանի հրաժարականը պահանջող ակցիաների մասին։ 2019թ հունվարի 1-ից «Ա1+»-ն այլեւս չունի նաեւ 15 րոպեանոց եթերի հնարավորություն «Արմնյուզ»-ում, քանի որ ընկերության սեփականատերերը փոխվեցին։ Քաղաքական դաշտի փոփոխությունները արագ փոխեցին մեդիա դաշտը. ստույգ կամ դեռ ասեկոսների մակարդակով տեղեկությունների համաձայն՝ դրանց մեծ մասը դարձան Ռոբերտ Քոչարյանի կողմից ֆինանսավորվող։ Ըստ «Ա1+» հեռուստաընկերության տնօրեն Մեսրոպ Մովսեսյանի՝ այսօր մեդիա դաշտը բաժանվել է սեւ ու սպիտակի։ Նրա տպավորությամբ՝ քարոզչական պատերազմում առայժմ հաղթում են սեւերը, որոնք ավելի շատ գումարներ ունեն։ Այս ամենը պարոն Մովսեսյանին հիշեցնում է 2002թվականը՝ «Ա1+»-ի եթերազրկումը եւ Ռոբերտ Քոչարյանի՝ ապօրինի եւ անաչառ լրատվության ոչ մի կանոնի մեջ չտեղավորվող խորհուրդը ընդդիմադիրներին, թե նրանց մեջ հարուստներ կան, կարող են միանալ եւ ֆինանսապես աջակցել «Ա1+»-ին։ «Ավելորդ է անգամ ասել, թե այդ օրենքի ինչ մեծ խախտում էր նրա խորհուրդը։ Իսկ եթե չեթերազրկվեր «Ա1+»-ը, վստահեցնում եմ, հանգիստ կարող էր զարգանալ գովազդի հաշվին, ինչը եւ արել էր իր հիմնադրումից մինչեւ եթերազրկումը»,-ասում է պարոն Մովսեսյանը։ Նա նաեւ կարծում է, որ Քոչարյանին այսօր պետք է եկել իր իսկ օրինախախտ խորհուրդը, եւ մեծ գումարներով «հորինում է լրատվամիջոցներ»։ Մեսրոպ Մովսեսյանը կարեւորում է նոր կառավարության դիրքորոշումը եւ մեջբերում է Նիկոլ Փաշինյանի խոսքերը վերջին ասուլիսում. «Ամեն օր միլիոնավոր դոլարներ են ծախսվում կառավարության դեմ սև քարոզչության համար, և կառավարությունը դրա դեմ բան չի անում, որովհետև կարևորում է խոսքի ազատությունը»: Բայց նաեւ նկատում է, որ մեդիադաշտում պայքարն այնքան է թեժացել, որ տպավորություն է, թե. «Ռոբերտ Քոչարյանը պատրաստվում է արդեն Հանրային հեռուստաընկերությունն էլ գնել եւ... վերջ»։ «Դե , «Ա1+»-ը չի պատրաստվում այդ խաղերին մասնակից դառնալ, ունի իր սկզբունքները, որոնց երբեք չի դավաճանել»,- ասում է Մեսրոպ Մովսեսյանը։ Արդեն 17 տարի է՝ եթերազրկված «Ա1+»-ն իր կայքում ներկայացնում է այն կարեւորագույն իրադարձությունները, որոնք տեղի են ունենում երկրում։ Ինչպես կատակում են «Ա1+»-ում՝ հաջորդ 17 տարիներն էլ բացառություն չեն լինելու։ Սակայն ընկերությունը չի հրաժարվում հեռուստաեթեր վերադառնալու մտքից եւ պատրաստվում է մասնակցել 2020թ կապուղիների մրցույթին։ Երբ փորձում ենք գնահատել եթերազրկումից հետո «Ա1+»-ի ստեղծածը, կարող ենք ասել, որ անկախ դժվարություններին՝ ընկերությունը չի կորցրել իր դեմքը, հավատարիմ է մնացել բազմակարծության եւ օբյեկտիվության չափանիշներին։ Եթե դրան գումարում ենք նաեւ մինչ եթերազրկումը՝ 1991թ-ից ի վեր ստեղծածը, տեսնում ենք, թե ինչ մեծ ժառանգություն է ստեղծել «Ա1+»-ը։ Առանց համեստության կարելի է նշել, որ այսօր «Ա1+»-ն ունի ամենաարժեքավոր արխիվներից մեկը։ «Ա1+»-ը որոշել է անակնկալ անել իր հավատարիմ լսարանին, եւ ապրիլի 2-ին՝ կներկայացնենք ընտրանի՝ մեր լավագույն արտադրանքից։ Իսկ մեր արտադրանքը միայն լրատվական չէ, այլեւ հաղորդումներ, ֆիլմեր եւ այլն։ Կհանդիպենք ապրիլի 2-ին։
