«Հայոց ցեղասպանության թանգարան-ինստիտուտ» հիմնադրամը տնօրենի նոր ԺՊ ունի (տեսանյութ)
«Հայոց ցեղասպանության թանգարան-ինստիտուտ» հիմնադրամի տնօրենի ժամանակավոր պաշտոնակատար նշանակվեց գիտքարտուղար Նարինե Մարգարյանը: Որոշումը կայացվեց հիմնադրամի խորհրդի նիստում: «Առաջարկ կա թանգարան ինստիտուտի տնօրենի պարտականությունը դնել աշխատակիցներից մեկի վրա, իմ առաջարկն է՝ հաշվի առնելով սպեցիֆիկան և վերջին շրջանում ստեղծված մթնոլորտը, այդ պարտականությունը դնել գիտքարտուղար Նարինե Մարգարյանի վրա»,-ասաց ՀՀ Կրթության և գիտության նախարարի տեղակալ Հովհաննես Հովհաննիսյանը: Նարինե Մարգարյանը կպաշտոնավարի առնվազն երկու ամիս, մինչ հիմնադրամի տնօրենի պաշտոնի թափուր մրցույթ հայտարարել: Իսկ հիմնադրամի հոգաբարձուների խորհրդի նախագահ ընտրվեց Ռայմոնդ Գևորգյանը: Նա թեև Հայաստանում չէր, սակայն օնլայն կապի միջոցով տվեց իր համաձայնությունը: Հայկ Դեմոյանի հետ կապված խնդիր չենք ունեցել, նրա կողմից զգայական, անհավասարակշիռ մոտեցումների ականատես եղանք, ասում է ՀՀ Կրթության և գիտության նախարարի տեղակալ Հովհաննես Հովհաննիսյանը: «Անառողջ մթնոլորտ կար թանգարանում եւ դա իրենից որոշակի ճնշումներ էր ենթադրում: Գեւորգ Վարդանյանը, որը համաձայնվել էր լինել ժամանակավոր պաշտոնակատար, շատ անսպասելի հրաժարական է տալիս, ինչը բազմաթիվ ենթադրությունների տեղիք է տալիս»: Ինչ վերաբերում է Նարինե Մարգարյանի թեկնածությանը, ԿԳՆ փոխնախարարը նշեց. «Նա երբեք կոնֆլիկտների մեջ չի եղել, կոմպրոմիսային տարբերակ էր, եւ 14 տարի թանգարանում լինելով տիրապետում է թանգարանի բոլոր խնդիրներին»:
