Իմ ամուսինն էր իմ թիկունքը, ուրիշ աջակցություն չեմ ունեցել. Լիաննա Հարությունյան (տեսանյութ)
«Դարը փոխվել է։ Ինստագրամում ու ֆեյսբուքներում են այսօր արտիստները, երաժիշտներն իրենց գովազդով զբաղված։ Ասեմ, որ իմ կարծիքով, թերևս Գեորգիևին է հաջողվել բիզնեսն ու արվեստը բարձր մակարդակի վրա պահել։ «Ես, օրինակ՝ ինստագրամում էջ չունեմ։ Սա սկզբունքային մոտեցում է, հրաշալի սոպրանո Լիաննա Հարությունյանն էլ այս մոտեցումը ունի», -ասում է Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը։ Վաղը՝ «Երևանյան հեռանկարներ» միջազգային երաժշտական փառատոնի շրջանակներում, ազգային ֆիլհարմոնիկ նվագախմբի հետ ելույթ կունենա օպերային երգչուհի Լիաննա Հարությունյանը։ 1996-թվականից նա ամուսնու, որ նույնպես օպերային երգիչ է և որդու հետ, որը թատերական բեմադրիչ է, բնակվում է Ֆրանսիայում։ Հինգ տարի առաջ նրան հրավիրեցին Քովենտ Գարդեն։ «Պետք է լինել շատ համառ, որ չկոտրվես։ Սա է ինձ սովորեցրել կյանքը՝ ապրել, երգել, պայքարել»,-ասում է երգչուհին։ -Իմ ամուսինն էր իմ թիկունքը։ Ուրիշ աջակցություն չեմ ունեցել։ Ունեցել եմ ուսուցիչներ ու խորհրդականներ։ Հաղթել եմ ու պարտվել, ու նորից հաղթել»։ Երևանյան համերգի համար Լիաննա Հարությունյանը հրաժարվել է այլ հրավերներից և նրա խոսքով անչափ հուզիչ տարիներ անց վերադառնալ հայրենի երկիր, բացել սիրտն ու հոգին իր ժողովրդի առջև։