ՍԱՊԾ պետի ընտրությունը աղմուկ է բարձրացրել (տեսանյութ)
Սննդամթերքի անվտանգության պետական ծառայությունը նոր պետ ունի՝ ի դեմս Գեորգի Ավետիսյանի: Այսօր նրա առաջին աշխատանքային օրն է։ «Կվերականգնենք վստահությունը ոլորտի նկատմամբ, կտարվի պայքար կոռուպցիայի դեմ եւ մասնագիտական կադրերով կհամալրենք ոլորտը»: Մինչ Գեորգի Ավետիսյանը թվարկում է ոլորտի առաջնահերթությունները, պաշտոնի հավակնորդներից՝ միջազգային փորձագետ Գրիգոր Գրիգորյանը դժգոհում է ընտրությունների անցկացման կարգից։ «Նոր Հայաստանի պատմության մեջ կայացած առաջին ընտրության արդյունքները կեղծվեցին»,-ասում է նա: «Կայացել է տեսչական մարմնի նիստ, որտեղ պետք է քննարկվեր կառավարության կողմից առաջարկված թեկնածությունը: Մրցույթ, որպես այդպիսին` չի եղել»,-հավելում է Գրիգոր Ավետիսյանը: ՍԱՊԾ պետի պաշտոնին հավակնել են 3 թեկնածու՝ Գրիգոր Գրիգորյանը, Պետական պահպանության ծառայության սանիտարական բժիշկ՝ Արարատ Գյուլումյանը եւ Անասնաբուսասանիտարական լաբորատոր ծառայությունների կենտրոնի տնօրենի պաշտոնակատար Գեորգի Ավետիսյանը: Գրիգոր Գրիգորյանի համար անհասկանալի է, թե ինչո՞ւ գործընթացի անցկացման մասին պատշաճ իրազեկում չի եղել: «Դա եղել է ակնհայտ քողարկված գործողություն: Հայտարարությունը եղել է ֆեյսբուքում, ոչ թե իրենց պաշտոնական կայքում: Գրված չէր նույնիսկ վերջնաժամկետը»: Գեորգի Ավետիսյանն էլ նշում է. «Ինձ կառավարությունն է առաջարկել, կոնկրետ առաջին փոխվարչապետ Արարատ Միրզոյանի կողմից եմ առաջարկը ստացել»: Գրիգոր Գրիգորյանի համար կասկածի տեղիք են տվել հանձնաժողովի անդամների ով լինելը: «Մրցույթի հանձնաժողովում երկու եղբայրներ են՝ Պիպոյան եղբայրները: Նրանք Գեորգի Ավետիսյանի ընկերներն են: Այս հանձնաժողովն իր մեջ պարունակում է շատ լուրջ կոռուպցիոն ռիսկեր, սա քաղաքական կոռուպցիա է»,-նշում է նա: «Եթե նկատի ունեք Գիրգոր Գրիգորյանի ասածը, ապա նա է ինձ Պիպոյան եղբայրների հետ ծանոթացրել: Նրանք շատ բծախնդիր են եւ պահանջկոտ իրենց ընկերների նկատմամբ»,- ասում է Գեորգի Ավետիսյանը: Չնայած Գեորգի Ավետիսյանի նշանակումը աղմուկ է առաջացրել, վերջինս պնդում է՝ կարճ ժամանակ անց այս կառույցում կոռուպցիան իսպառ կվերանա:
