ՀԺԱՄ-ն սկսում է արտախորհրդարանական ուժերի հետ բանակցել
Հարգելի գործընկերներ
Ազգային ժողովի խմբակցությունները հանդես են եկել համատեղ հայտարարությամբ, որով ազդարարում են Ընտրական օրենսգրքի փոփոխությունների շուրջ խորհրդարանական ուժերի մասնակցությամբ կազմակերպվող աշխատանքների մեկնարկի մասին:
Այս առիթով հայտնում ենք, որ Ազգային ժողովում ներկայացված ուժերը բավարար չափով չեն արտացոլում յուրաքանչյուր քաղաքացու իրական քվեն և նման ձևաչափով խորհրդակցություններ սկսելու գործընթացն ինքնին չի կարող համահունչ լինել քաղաքական ներկա իրադրությանը: Ելնելով քաղաքական լուծումներ տալու առաջնահերթությունից՝ անհրաժեշտ էր առավել մասնակցային և ընդգրկուն ձևաչափ որդեգրել:
Ակնհայտ է, որ նման ձևաչափը չի արտահայտում նաև վարչապետի որոշմամբ հաստատված ընտրական օրնեսդրության բարեփոխումների հանձնաժողովի անհատական կազմը, քանի որ նրանում ներկայացված չէ արտախորհրդարանական ուժերի որևէ ներակայացուցիչ:
Ուստի, «Հայաստանի ժողովրդավարական ազատական միություն» կուսակցությունը (ՀԺԱՄ) սկսում է արտախորհրդարանական ուժերի հետ ակտիվ բանակցային գործընթաց՝ արդեն իսկ ստեղծված հարթակների հետ համագործակցելու և Ընտրական օրենսգրքի բարեփոխումների շուրջ միասնական մոտեցմամբ և առաջարկություններով հանդես գալու համար:
ՀԺԱՄ ՎԱՐՉՈՒԹՅՈՒՆ