«Նախարարը թող մեր խնդրին լուծում տա». Ստանիսլավսկու թատրոնում լարված վիճակ է (տեսանյութ)
Երևանի Ստանիսլավսկու անվան ռուսական դրամատիկական թատրոնում գեղարվեստական ղեկավարի թեկնածուի շուրջ վեճերը չեն հանդարտվում։ Դերասանները դժգոհ են, որ թեկնածուն նախկին ղեկավարի դուստր Նորա Գրիգորյանն է։ Թատրոնի դերասան Ռոբերտ Հակոբյանը ևս առաջադրել է իր թեկնածությունը, որպեսզի Նորա Գրիգորյանը չընտրվի։ Վերջինս լրագրողների հետ հանդիպման ժամանակ նշեց, որ թատրոնի կոլեկտիվի մեծամասնությունը չի ցանկանում տեսնել Նորա Գրիգորյանին այդ պաշտոնում: Ռոբերտ Հակոբյանի խոսքերով, այդ պաշտոնն ընտրովի չէ, այլ նշանակումով է։ Դերասանը ցանականում է, որ ներկայիս մշակույթի նախարար Լիլիթ Մակունցը գա և հանդիպի թետրոնի անձնակազմի հետ՝ խնդրին լուծում տալու համար: «Նախարարը դեռ մեզ հետ չի հանդիպել, իմ միակ խնդրանքն է նախարարին, որ գա թատրոն և հանդիպի խմբի հետ: Գեղարվեստական ղեկավարի հարցը դեռ չի լուծվում: Թող նախարարը գա և խոսենք: Մենք պետք է ներկայացնենք, թե ինչ պրոբլեմներ կան թատրոնում»,- նշեց Ռոբերտ Հակոբյանը: Ըստ Ռոբերտ Հակոբյանի՝ առանց գեղարվեստական ղեկավարի թատրոնը չի կարող նորմալ ներկայացումներ բեմադրել։ «Այս պահին թատրոնը՝ կարող ենք ասել, որ առանց ղեկ է մնացել»,- ասաց դերասանը։ Նա նաև ավելացրեց, որ Նորա Գրիգորյանը հինգ տարի է թատրոնում ներկայացումներ է բեմադրել, սակայն դրանք անհաջող են եղել։ «Մինչ այս Նորա Գրիգորյանը օգտվել է իր դիրքից և իր համար ամենաթողություն է եղել: Նա ինչ ուզել, երբ ուզել՝ բեմադրել է, սակայն նշեմ, որ դրանք այնքան էլ հաջողված ներկայացումներ չեն»,- ասում է դերասան Ռոբերտ Հակոբյանը։ Նշվեց, որ Նորա Հակոբյանը վայելում էր նախկին առաջին տիկին Ռիտա Սարգսյանի հովանավորչությունը։ «Եթե հեղափոխությունը և իշխանափոխությունը չլիներ, ապա Նորա Գրիգորյանը արդեն նստած կլիներ գեղարվեստական ղեկավարի պաշտոնում, քանի որ նրան աջակցում էր Ռիտա Սարգսյանը»։ Բանախոսը շեշտում է, որ թատրոններում «կլանային» համակարգ է և պաշտոնները ժառանգաբար են փոխանցվում։ Նշենք նաև, որ նախկին մշակույթի նախարար Արմեն Ամիրյանը ամիսներ առաջ նշել էր, որ թատրոնի գեղարվեստական ղեկավարի ընտրության հարցը դեռևս կարելի է հետաձգել: Սակայն Ռոբերտ Հակոբյանի պնդմամբ` այս կերպ թատրոնի ղեկը լքված է մնացել: