«Ադաբրյամսի» մթնոլորտում առաջընթաց չի լինում. Արմեն Ռուստամյան (տեսանյութ)
Նիկոլ Փաշինյանի կառավարությունը չվերացրեց կուտակային կենսաթոշակային համակարգի պարտադիր բաղադրիչը, պարզապես փոխեց տոկոսային տեղաբաշխումը՝ պետության վրա թողնելով ոչ թե 50, այլ 75 տոկոս բեռը։ Նախարարներ ունեցող ՀՅԴ-ն դեմ է պարտադիր բաղադրիչին՝ առնվազն երեք պատճառով: Նախ՝ Դաշնակցությունը կողմ է սերունդների համերաշխության սկզբունքին, հետո՝ անձի սեփականության իրավունքին հակասում է պարտադիր բաղադրիչը և երրորդ պատճառն այն է, որ ժողովրդի սոցիալական վիճակը այնքան բավարար չէ, որ հավելյալ եկամուտներ անձը տրամադրի իր ապագայի համար,- ասում է Դաշնակցություն խմբակցության ղեկավար Արմեն Ռուստամյանը: Անդրադառնալով երեկ՝ կառավարության նիստում տնտեսական զարգացման եւ ներդրումների նախարար Արծվիկ Մինասյանի եւ վարչապետ Նիկոլ Փաշինյանի բանավեճին, Արմեն Ռուստամյանը նշեց՝ պետք է հարգանքով մոտենալ այլ տեսակետի։ «Կառավարությունը կոլեգիալ մարմին է և միանձնյա որոշումներով չպետք է առաջ գնա: Եթե կան տարաձայնություններ, ոչ ոք չի կարող մյուսին ստիպել, որ նա քվեարկի մեծամասնության նման: Ես կտրականապես մերժում եմ «Ով մեզ հետ չէ, մեր դեմ է» սկզբունքը: Սա մի քիչ հիշեցնում է ստալինյան շրջանը: Սա ճիշտ մոտեցում չէ»: Դաշնակցություն խմբակցության ղեկավարի կարծիքով սեփական տեսակետը պաշտպանելը չի նշանակում հակադրվել միասնականությանը: «Այդ պարագայում՝ քվեարկությունը պետք է վերացնել: Բայց դա իմաստ ունի չէ՞: Կառավարության մեջ ամեն մեկն իր ոլորտի պատասխանատուն է եւ վարչապետն այդ ամենը համադրում է: Կարծում է, որ համընդհանուր «ադաբրյամսի» մթնոլորտում առաջընթաց չի լինում: Մենք տեսել ենք այդ ամենը եւ այդպես շարժվելը մեզ համար անընդունելի է»: Արմեն Ռուստամյանը Հայաստանի նոր իշխանություններին հիշեցնում է նախկինում արված հայտարարությունները: «Սուպերվարչապետությունից էին խոսում, հիմա հենց հարցերի հարցն այն է, որ վարչապետի լիազորությունները պակասեցնելու ուղղությամբ պետք է հստակ քայլեր կատարվեն: Դեռ այդ քայլերը չեն կատարվում»: Ելք խմբակցության պատգամավոր Արամ Սարգսյանն ասում է, որ ի սկզբանե պարտադիր կուտակային կենսաթոշակային համակարգին կողմ է եղել: «Խմբակցությունում ես միակ մարդն էի, որ համարում էի դա դրական, եւ Արտակ Զեյնալյանը իմ հետ ամենապինդն էր կռվում, որ դա սահմանադրության հետ կապված լուրջ խնդիրներ է ենթադրում»: Արամ Սարգսյանը մտավախություն չունի, որ գումարները կփոշիանան։ «Այն ընկերությունը որը տնօրինում է գումարը, տնօրինում է նաեւ Կանադայի կեսաթոշակային ֆոնդը, եւ եթե Կանադայում կասկածներ չկան , ապա մեզանում էլ խնդիրներ չեն լինի»,- ասում է Արամ Սարգսյանը հավելելով, - այնքան էլ ճիշտ չէ այս հարցում չվստահել մի իշխանության, որին ժողովուրդն է բերել: