«Կաշխատենք օգտագործել այս հնարավորությունը». Հենրիխ Մխիթարյան (տեսանյութ)
Ֆուտբոլի Հայաստանի հավաքականն այսօր Ավանի ֆուտբոլի ակադեմիայում անցկացրեց առաջին մարզումը՝ մայիսի վերջին եւ հունիսի սկզբին նախատեսված Մալթայի եւ Մոլդովայի հավաքականների հետ ընկերական խաղերի նախապատրաստական փուլի շրջանակում: Պարապմունքին մասնակցեցին հրավիրված բոլոր 23 ֆուտբոլիստները: Դարպասապահներին առաջին անգամ մարզում էր մեր ընտրանու փառապանծ դարպասապահ Ռոման Բերեզովսկին: «Մեկ օրում դժվար է կարծիք կազմել դարպասապահի մասին, բայց լավ, խոստումնալից տղաներ են: Կաշխատեմ ամեն ինչ անել, որպեսզի ավելի լավը դառնան», - մարզումից հետո ասաց մեր անվանի դարպասապահը: Պարապմունքից հետո լրագրողները հնարավորություն ստացան զրուցել նաեւ ֆուտբոլիստների հետ: Բնականաբար, առաջին հերթին մենք հետքրքրվեցինք թիմի ամենաանակնկալ նորեկով՝ Կոլումբիայից ժամանած Ժորի Մոնրո Արարատով: «Անկեղծ ասաց, ես բոլովին չէի սպասում, որ հրավեր կստանամ Հայաստանի հավաքականից: Միշտ երազում է հանդես գալ Կոլումբիայի ազգային թիմում: Սակայն այսօր ես այստեղ եմ եւ որոշեցի խաղալ Հայաստանի հավաքականում: Ամեն ինչ կանեմ թիմին օգտակար լինելու համար: Միաժամանակ ցանկանում եմ տեղափոխվել Եվրոպա եւ հանդես գալի տեղի թիմերից մեկում», - մեր թղթակցի հետ զրույցում ասաց կոլումբիական «Բոլակա Չիկոյի» պաշտպանը: Հայաստանի հավաքականի ավագ Հենրիխ Մխիթարյանը լրագրողների հետ հանդիպման ժամանակ ասաց, որ նոր հավաքականից մեծ սպասելիքներ ունեն եւ ֆուտբոլիստները, եւ գլխավոր մարզիչ Վարդան Մինասյանը: «Կաշխատենք պատվով խաղալ եւ օգտագործել այս հնարավորությունը: Հեշտ չի լինելու մեզ համար, սակայն կփորձենք հաջողության հասնել», - նշեց Լոնդոնի «Արսենալի» ֆուտբոլիստը: Իսկ ահա հավաքականի փորձառու կիսապաշտպան Գեւորգ Ղազարյանը կարծում է, որ նոր փուլ է սկսվում բոլորի համար: «Շատ կարեւոր հանդիպումներ են մեզ սպասում, քանի որ հավաքականի համար նոր փուլ է սկսվում. մեզ համար՝ որպես ֆուտբոլիստներ, ձեզ համար՝ որպես լրագրողներ, եւ երկրպագուների համար՝ որպես երկրպագուներ: Սա շատ լավ շանս է մեզ համար: Մենք պատրաստ ենք այս կարեւոր փուլին», - եզրակացրեց հավաքականի ֆուտբոլիստը: Հավելենք, որ Հայաստանի հավաքականը մայիսի 29-ին ընկերական խաղ կանցկացնի Մալթայի ազգային թիմի հետ, իսկ հունիսի 4-ին ուժերը կչափի Մոլդովայի ընտրանու հետ: Երկու խաղերն էլ կկայանան Ավստրիայում: