Ակտիվիստին կալանավորելու որոշումը Վերաքննիչ դատարանը համարել է ապօրինի
Վերաքննիչ դատարանն ակտիվիստ Տիգրան Մազմանյանին ձերբակալելու եւ կալանավորելու որոշումը համարել է ապօրինի: Պաշտպան Արա Ղարագյոզյանն « Ա1+»-ին հայտնեց, որ Վերաքննիչ դատարանը որոշումը կայացրել է այսօր։ Տիգրան Մազմանյանը մեղադրվում էր ապրիլի 14-ին «Հայաստանի հանրային ռադիո»-ի վարչական շենք մուտք գործելիս զինված պահպանություն իրականացնող ոստիկանության ծառայողի նկատմամբ բռնություն գործադրելու մեջ։ «Ոստիկանի տված ցուցմունքը, որ իր նկատմամբ բռնություն է գործադրվել, ապօրինի է։ Մենք տեսանյութ ենք ցուցադրել, որ Տիգրան Մազմանյանը ձեռքերը վեր բարձրացրած հենց այդ ոստիկանի կողքով է անցնում»,- ասում է Արա Ղարագյոզյանը։ Երեւան քաղաքի ընդհանուր իրավասության դատարանի Ավանի նստավայրի դատավոր Արթուր Մկրտչյանը, այդ հանգամանքը, սակայն, ըստ պաշտպանի՝ հաշվի չէր առել։ Արա Ղարագյոզյանը կարծում է, որ այժմ քննության առարկա պետք է դառնա դատավոր Արթուր Մկրտչյանին պատասխանատվության ենթարկելու հարցը։ Փաստաբանը հիշեցնում է, որ դատավորը կալանավորման որոշում էր կայացրել նաեւ Հաց բերողի՝ Արթուր Սարգսյանի նկատմամբ, ով ուներ ծանր հիվանդություն:
