Քաղբանտարկյալների հարցը ցուցիչ է՝ Հայաստանը ժողովրդավար է, թե ոչ. բողոքի ակցիա (տեսանյութ)
Ազգային ժողովի «Ելք» խմբակցության պատգամավորներ Սասուն Միքայելյանը եւ Հովիկ Աղազարյանը միջնորդել են, որ ԼՂՀ պաշտպանության բանակի նախկին հրամանատար Սամվել Բաբայանի խափանման միջոց կալանքը փոխվի: «Մենք դիմել ենք, իրենք էլ հաճույքով աջակցել են: Մենք կարիք չենք տեսել ավելի շատ ստորագրություններ հավաքելու, այդ երկուսը բավարար է», -ասում է «Պոլիտէկոնոմիա» հետազոտական ինստիտուտի տնօրեն Անդրանիկ Թևանյանը: Սամվել Բաբայանի կողմնակիցները Վճռաբեկ դատարանին ներկայացրեցին պատգամավորների երաշխավորագիրը: «Հնարավորինս սեղմ ժամկետում ակնկալում ենք դատարանի որոշումը»: Քաղաքացիները պահանջում են ազատ արձակել Սամվել Բաբայանին: Հիշեցնենք, որ Սամվել Բաբայանը մեղավոր էր ճանաչվել «Իգլա» տեսակի զենիթահրթիռային համալիր ձեռք բերելու, ինչպես նաև կեղծ փողերի շրջանառության համար։ Վերաքննիչ դատարանն անփոփոխ էր թողել վճիռը, այսինքն՝ 6 տարվա ազատազրկումը: «Մի բան ենք պահանջում՝ լինել արդարացի, դատարանները պատվեր են կատարել: Ստով, կեղծիքով Սամվել Բաբայանը հայտնվել է ճաղերի հետեւում: Կալանավայրերում այսօր շատ անմեղ մարդիկ կան, Սամվելից հետո պետք է անցնենք մնացած բոլորին», ասում է ԱԱԾ նախկին փոխնախարար Գուրգեն Եղիազարյանը: «Ազգային համաձայնություն» կուսակցության նախագահ Արամ Հարությունյանը նշում է. «Եթե նույնիսկ մեկ քաղբանտարկյալ լինի, ապա սա կնշանակի, որ Հայաստանում որեւէ բան չի փոխվել: Քաղբանտարկյալների հարցը ցուցիչ է՝ Հայաստանը ժողովրդավար է, թե ոչ»: Բայց մի հարցի պատասխան դեռեւս պարզ չէ՝ արդյո՞ք Վճռաբեկ դատարանը վարույթ ընդունել է Սամվել Բաբայանի վճառաբեկ բողոքը, թե ոչ: Ապրիլի 17-ին պաշտպան Ավետիս Քալաշյանը վճռաբեկ բողոք է ներկայացրել, սակայն մինչ հիմա դատարանից արձագանք չկա՝ պատճառաբանությամբ, թե իրենք դեռ ժամանակ ունեն։ Նշենք, որ այսօր մի խումբ քաղաքացիներ Վճռաբեկ դատարանի դիմաց բողոքի ակցիա էին կատարել ի պաշտպանություն Սամվել Բաբայանի։
