Երկու հայտարարություն՝ Շիրակի պետական համալսարանից
ՇԻՐԱԿԻ ՊԵՏԱԿԱՆ ՀԱՄԱԼՍԱՐԱՆԻ ՌԵԿՏՈՐ ՍԱՀԱԿ ՄԻՆԱՍՅԱՆԻ ՀԱՅՏԱՐԱՐՈՒԹՅՈՒՆԸ
Սիրելի՛ ուսանողներ,
Դուք եղել եք մասնակիցը մերօրյա թավշե հեղափոխության և ձեր քաղաքացիական անհնազանդությունը պսակվել է հաջողությամբ:
Այս օրերի լոկալ, իրենց ախորժակը բավարարելուն միտված կոչերը, որոնք արվում են նախկին ռեկտոր Վարդևան Գրիգորյանի, նախկին պրոռեկտոր Անահիտ Ֆարմանյանի, նախկին դասախոսներ Գագիկ Համբարյանի և Հովհաննես Խորիկյանի կողմից, ոչ այլ ինչ են, քան ձեր՝ ազատ քաղաքացու իրավունքի ոտնձգություն:
Ընդամենը այս չորսը, ովքեր իբր թե խոսում են օրենքի հայրենիքից, իրավունքի Հայաստանից: Իրենց իրավունքները իրավական դաշտում հաստատելու փոխարեն լծվել են ձեզ թիրախ դարձնելու անբարո գործին՝ հուսալով, որ իրենց կհաջողվի սողոսկել բուհի պատերից ներս՝ վերականգնելու իրենց բաց թողած գումարահավաքը:
Համոզված եմ, որ դուք տիրապետում եք ստեղծված իրավիճակին և ձեզ հնարավոր չէ շփոթեցնել՝ պաշտոնամոլությունը արդարության տեղ հրամցնելով:
Համոզված եմ նաև, որ Անահիտ Ֆարմանյանի դասադուլի մասին սին հայտարարությունները վատ կրկնօրինակումն են իրական, հեղափոխական մեծ դասադուլի, որը դուք արդեն արել եք:
Առավել քան համոզված եմ, որ վաղը և ընդհանրապես համալսարանում տիրելու է ուսումնական բնականոն տրամադրություն:
.......................... Շիրակի պետական համալսարանի ուսանողական գիտական ընկերության (ՈՒԳԸ) անդամների հայտարարությունը ՈՒԳԸ նախագահ Քաջիկ Հարությունյան Հանդիսանալով ՇՊՀ ՈւԳԸ նախագահ իմ խոր մտահոգությունն եմ հայտնում ՇՊՀ շուրջ ստեղծված իրավիճակի վերաբերյալ, որի պատճառով մենք ստիպված եղանք հետաձգել մայիսի 10-ին նախանշված ուսանողական հանրապետական գիտաժողովը: Ստեղծված իրավիճակը ոչ մի կերպ չի բխում ուսանողների շահերից, խաթարվում է ուսումնական գործընթացը, այն էլ ուսանողների համար շատ կարևոր քննական (հատկապես պետական ավարտական քննությունների) շրջանում: Հուսով եմ, որ ՀՀ նորընտիր իշխանությունները շատ արագ բուհում կիրականացնեն համակողմանի, թափանցիկ գործողություններ ստեղծված իրավիճակը հանգուցալուծելու համար՝ առաջին հերթին օժանդակելով ուսանողական համակազմի և ուսումնական գործընթացի անխափան աշխատանքին: Ես, որպես ՈՒԳԸ-ի նախագահ, ինձ իրավունք եմ վերապահում հորդորել կողմերին մնալ իրավական դաշտում և ուսանողներին չներքաշել անկանխատեսելի գործընթացների մեջ:
