ՀՀԿ-ականները հրաժարվում են անդամակցությունից եւ դա շղթայական ռեակցիա է ունենալու (տեսանյութ)
Հանրապետական այն պատգամավորները, ովքեր իրենց ձայնը կտան վարչապետի թեկնածու Նիկոլ Փաշինյանին, հնարավորություն կունենան հաջորդ ընտրությունների ժամանակ խորհրդարանում հայտնվել. «Իրենց ռեաբիլիտացիան սա պետք է լինի: Այդ մարդկանց խումբը կարող է ստեղծել նաեւ իր կուսակցությունը: Տեսեք Ֆելիքս Ցոլակյանի մասին են խոսում: Հանրապետական մարդ է, բայց ազնիվ անցյալ է ունեցել»,- ասում է «Մոդուս վիվենդի» կենտրոնի հիմնադիր և նախագահ Արա Պապյանը: Քաղաքագետները վստահեցնում են՝ Հանրապետական կուսակցության բազմաթիվ անդամներ սկսել են հրաժարվել անդամակցությունից եւ դա շղթայական ռեակցիա է ունենալու. «Շատ շատերը, որ այս կամ այլ ոլորտում ինչ- որ հեղինակություն ունեն, դուրս են գալիս կուսակցությունից եւ միանում են շարժմանը իրենք լրացուցիչ լծակ են, լրացուցիչ ճնշման միավոր են , որոնց միջոցով կարելի է ուժեղացնել նաեւ ճնշումը Հանրապետական խմբակցության վրա եւ ստանալ անհրաժեշտ արդյունքը»: https://youtu.be/3K5f93YoeD8 Բանախոսները Նիկոլ Փաշինյանի համար ձայներ ապահովելու այլ տարբերակ են առաջարկում: Գնալ եւ այսպես կոչված ռեյտինգային ընտրակարգով ընտրված պատգամավորներին ներկայացնել ժողովրդի կամքը: «Շատ շատերը գտնվում են եզրային իրավիճակի մեջ, մի փոքր էլ օրինական ճնշումը լրիվ օրինական է, որեւէ մեկը կոչ չի անում գլուխ ջարդելու, բայց ընտրված պատգամավորն էլ պարտավոր է լսելու իր ընտրողի ձայնը: Չեն ուզում ամբողջ ժողովրդի ձայնը լսեն, թող իրենց ընտրատեղամասինը լսեն»,- ասում է Արա Պապյանը: Ըստ նրա՝ մայիսի 8-ի ԱԺ հատուկ նիստում էլ չընտրվեց վարչապետ, ապա 50 օր շարունակվելու է ճգնաժամային իրավիճակը: «Բոլոր նրանք ովքեր երկրի եւ անվտանգության մասին են մտածում, պետք է շահագրգռված լինեն հնարավորինս արագ հանգուցալուծելու սա» : Բանախոսները չեն բացառում նաեւ, որ ՀՀԿ-ն մայիսի 8-ի ընտրությանը ներկայացնի իր թեկնածուին, ինչն ավելի կսրի իրավիճակը:
