Երիտասարդ մայրը 5 երեխայի հետ մասնակցում է ակցիաներին (տեսանյութ)
Այվազյանների ընտանիքը քաղաքացիական անհնազանդության շարժման առաջին օրերից հրապարակում է: Վստահ են, վաղն ուրիշ Հայաստանում են ապրելու: «Ամեն ինչ փոխվել ա, առաջ մտածում էին, թե կարող են մարդկանց ճնշել, բայց այս ամբոխին տեսնելով , արդեն իրենք էլ են մտածում, որ չի կարելի»,- ասում է Զավեն Այվազյանը: Սուրենն ու Նարեկը կատարվածը լավ չեն հասկանում, բայց այս ամենն իրենց համար է, վստահեցնում է երեխաների մայրը: «Ուզում եմ լավ հայրենիքում ապրեն, չեմ ուզում արտագաղթեն, եղել է պահ, որ ուզել ենք լքել Հայաստանը»: «Փոքրիկներս՝ Արթուրն ու Վիկան չեն ուզում արտագաղթել, բայց ներկայիս կառավարությունն այդպես է ուզում», -նշում է Հռիփսիմե Ստեփանյանը: Նաիրա Անդրեասյանն իր աղջկա հորդորով է առաջին անգամ եկել հրապարակ: «Մենք առաջին օրից 5 բալիկներիս հետ այստեղ ենք: Մեծերն առաջին շարքերում են, ես այստեղ՝ փոքրերի հետ»: Ծնողները վստահեցնում են, որ փոքրիկները չեն տրտնջում ամբողջ օրը փողոցում լինելով։ «Դժվար չի բալիկի հետ, ակտիվ գոռում ա Նիկոլ, նույնիսկ ռեժիմն ա կարգավորվել, քնում ա լավ: Հույս ունենք, որ երկրում շատ բան ա փոխվելու»,-ասում է Նաիրա Անդրեասյանը: Մարգարիտա Կարապետյանն էլ է առաջին օրվանից մասնակցում թոռնիկի հետ: «Հենց դուրս ենք գալիս, ասում է՝ տատիկ, գնո՞ւմ ենք Հայաստան»: Մասնագիտությամբ լեզվաբան Քնարիկն ակցիաների է գալիս միակ որդու՝ Սարգսի հետ: «Մենք սկսեցինք մասնակցել մեր երեխայի լավ ապագայի համար, որովհետեւ ինչ-որ պահի արգելք տեսանք: Ինչ-որ մակարդակի ես հասնում ու չես կարողանում աճել»: Ընտանիքը համալրելու մասին մտածում է, միայն թե պայմաններ լինեն: «Եթե լավ երկրում ապրենք, ու եթե լավ պայմաններ լիներ հնարավորություն կլիներ երկրորդ երեխան ունենալ»: Ի դեպ. երեխաները, որոնցից շատերը դեռ սահուն չեն խոսում, յուրատեսակ ակցիաներ են անում՝ գոչելով միացե~ք, Հայաստա~ն: