«Ընդդիմադիր ոչ բոլոր ուժերը կարող են հանդուրժել, երբ հանկարծ երկիրը սկսում է արագացող տեմպերով զարգանալ» (տեսանյութ)
Արդարադատության նախարար Դավիթ Հարությունյանը չի կարծում, որ «Մերժիր Սերժին» նախաձեռնության հավաքները խաղաղ են: «Ձեռքերը բարձրացնելը վատ չէ, բայց դա չի նշանակում, որ միտինգը խաղաղ է: Երբ շրջափակում ենք շենքը, որ աշխատակիցները չկարողանան ելումուտ անեն, սա ինքնին երբեք չի կոչվում խաղաղ: Եթե իրենց թվում է, որ բռնությունը դա ֆիզիկական ուժ գործադրելն է, դա այդպես չէ: Պատկերացրեք, եթե մենք ձեզ այս շենքում պահենք, մի 10 հոգով դրսում կանգնենք, դռան մոտ, խաղաղ, ձեռքերներս վեր, ժպտալով, որ մենք խաղաղ մարդիկ ենք եւ բռնությանը դեմ ենք , բայց դուք չկարողանաք դուրս գալ: Արդյոք առկա է բռնություն, իրավունքն ասում է այո»,- այսօր կառավարության նիստից հետո ասաց Դավիթ Հարությունյանը: Թեեւ Դավիթ Հարությունյանին անհանգստացնում է իրավիճակը, սակայն նա մի կարծիք ունի.«Ընդդիմադիր ոչ բոլոր ուժերը կարող են հանդուրժել, երբ հանկարծ երկիրը սկսում է արագացող տեմպերով զարգանալ: Դա կարող է մտահոգություն առաջացնել, որ նվազում են շանսերը հաջորդ ընտրության ժամանակ: Եւ ինչու չէ, չօգտագործել առիթը մեկ անգամ եւս դանդաղեցնելու ընթացքը»: Այսօր կառավարության նիստն ուղեկցվում էր «Մերժիր Սերժին» բողոքի ակցիայով, իսկ ոստիկանական մեծ թվով ուժեր կենտրոնացել էին հենց գործադիր մարմինի շենքի առաջ: Նախարարը «Մերժիր Սերժին» կարգախոսը դասում է քաղաքական կարգախոսների թվին: Անդրադառնալով 16-ին ոստիկանության կողմից հավաքի ժամանակ ոստիկանության կողմից նռնակները կիրառելուն, նախարարը նշեց, որ դա միշտ էլ վտանգավոր է եղել, սակայն ոստիկանությունը համաչափ է գործել։ Կառավարության այսօրվա նիստում, որն առաջին անգամ վարել է վարչապետ Սերժ Սարգսյանը, անդրադարձ է եղել է երկրի զարգացման եւ իրավիճակի հետ կապված կարեւորագույն հարցերին: Այս նիստին Սերժ Սարգսյանը հրաժարվել է Կոնդում իրեն անհատույց հատկացված առանձնատնից: «Հիմա Հանրապետության երրորդ նախագահի բնակարանային խնդիրը լուծելու պահը չէ. կարելի է այդ խնդրին անդրադառնալ հետագայում, երբ այս աթոռին նստած կլինի մեկ այլ վարչապետ: Ես հուսով եմ, որ դուք ըմբռնումով եք մոտենում իմ որոշմանը»,- ասել է Սերժ Սարգսյանը նիստի ընթացքում: