29 երիտասարդ բերման է ենթարկվել (տեսանյութ)
Այսօր առավոտյան 29 երիտասարդ է բերման ենթարկվել, մի մասը ուսանողական ակցիայի մասնակիցներն են: Ինչպես «Ա1+»-ին հայտնեցին ոստիկանության լրատվական բաժնից, բերման ենթարկվածները մեղադրվում են վարչական իրավախախտումների մեջ: Իրավապաշտպանների միասնական թեժ գծից «Ա1+»-ին հայտնեցին, որ այս պահին փաստաբանները գնում են բաժիններ՝ պարզելու հանգամանքները: Թեժ գծից փոխանցեցին, որ երիտասարդներին տեղափոխել են ոստիկանության Կենտրոնի, Մաշտոցի, Էրեբունի, Նոր Նորքի եւ նույնիսկ Էջմիածնի բաժիններ: Փաստաբան Ռոբերտ Ռեւազյանն էլ փոխանցեց, որ նա երկար ժամանակ ցանկացել է մտնել ոստիկանության Կենտրոնի բաժին, թույլ չեն տվել, իսկ հետո հայտարարել են, որ բերման ենթարկվածներ իրենց մոտ չկան: Փաստաբանը դրանից հետո ուղեւորվել է ոստիկանության Էրեբունի բաժին: Ենթադրվում է՝ նրանք բերման են ենթարկվել ճանապարհը փակելու համար: Փաստաբան Երվանդ Վարոսյանն էլ մեջբերել է ՄԻԵԴ Աշուղյանն ընդդեմ Հայաստանի գործով որոշումը: Ըստ որի՝ երբ տեղի է ունենում առօրյա կյանքի խաթարում, այնուամենայնիվ դա չի կարող հիմնավոր պատճառ հանդիսանալ հավաքն արգելելու եւ հավաքների ու խոսքի ազատության իրավունքները խախտելու համար, քանի որ յուրաքանչյուր հավաք էլ որոշակիորեն խաթարում է առօրյա կյանքը, հետևաբար պետությունները պետք է դրսևորեն հանդուրժողականություն խաղաղ հավաքների նկատմամբ: