ԱՐԱ ԱԲՐԱՀԱՄՅԱՆԸ ԵՎ ՄԵՐ ՊԱՐՏՔԸ
Աջակցիր «Ա1+»-ինՌուսաստանին Հայաստանի ունեցած մոտ 100 մլն ԱՄՆ դոլար կազմող պարտքը մարելու համար նախատեսված հայկական ձեռնարկությունները փոխանցվելու են ռուսահայ գործարար, «Ռուսաստանի հայերի միության» նախագահ Արա Աբրահամյանին,- օգոստոսի 21-ի համարում հաղորդում է «Նեզավիսիմայա Գազետա» թերթը:
Ըստ երեւույթին խոսքը ռազմարդյունաբերական ոլորտի ձեռնարկությունների` «Մարս» գործարանի, Նյութաբանության ինստիտուտի եւ Մաթեմատիկական մեքենաների գիտահետազոտական ինստիտուտի մասին է, քանի որ Ռուսաստանին փոխանցվող 4-րդ ձեռնարկությունը` Հրազդանի ՋԷԿ-ը տրվելու է ՌԱՕԵԷՍ-ին:
Արդեն որոշված է, որ ռազմարդյունաբերական ոլորտի ձեռնարկությունները տնօրինելու է Համակարգերի Կառավարման Ռուսական Գործակալությունը: Հոդվածագիր Տատյանա Ռուբլյովան գրում է, որ Գործակալության նախկին ղեկավար Վլադիմիր Սիմոնովը նամակ է ուղարկել ՌԴ տնտեսական զարգացման նախարարություն եւ առաջարկել է հայկակական ձեռնարկությունների բաժնետոմսերը փոխանցել Արա Աբրահամյանի ղեկավարած «Սոգլասիե» ընկերությանը:
Նշվում է, որ այդ քայլին համաձայն է նաեւ ռուս-հայկական միջկառավարական հանձնաժողովի համանախագահ, «Գույք պարտքի դիմաց» բանաձեւի համահեղինակ Իլյա Կլեբանովը:
Ձեռնարկությունները Աբրահամյանին հանձնելը «կապահովի Հայաստանում «Ռուսաստանի հայերի միության» նկատմամբ քաղաքական դրական վերաբերմունքը եւ ՀՀ կառավարության եւ ԱԺ-ի աջակցությունը»:
«Նեզավիսիմայա Գազետան» նաեւ նշում է, որ Արա Աբրահամյանը մեծ հավակնություններ ունի եւ ցանկանում է ազդեցություն ունենալ 2003 թ-ին Հայաստանում կայանալիք նախագահական ընտրությունների ժամանակ:
