Սեյրան Օհանյանը կմիանա՞ ճակատին (տեսանյութ)
Պաշտպանության նախկին նախարար Սեյրան Օհանյանի հետ բանակցություններ են տարվում. «Բանակցողը Արմեն Մարտիրոսյանն է: Բանակցությունները դեռ գնում են, չի բացառվում ինչ- որ պահի միանա ճակատին»,- այսօր լրագրողների հետ հանդիպման ժամանակ ասաց «Հանուն Հայաստան պետության ճակատ»-ի անդամ, Ժառանգության փոխնախագահ Սուսաննա Մուրադյանը: «Հանուն Հայաստան պետության ճակատ»-ը հավակնում է դառնալ այն պլատֆորմը, որը կպայքարի իշխանափոխության համար: Ճակատը պատրաստվում է իր շուրջը համախմբել տարբեր քաղաքական ուժերի, անհատների: Կուսակցություններին Պետրոս Մակեյանը կոչ արեց համախմբվել. « Այս քսան օրը միմյանց հանդուրժենք, լռենք, որ կանխենք իշխանությունների վերարտադրությունը»,- ասաց «Ժողովրդավական հայրենիք» կուսակցության նախագահ Պետրոս Մակեյանը: Հերթական հանրահավաքը նախատեսված է վաղը: Ասուլիսի բանախոսները անդրադարձան նաեւ երկու օր առաջ հրապարակված Շուշիի առանձնակի գումարտակի հրամանատար Ժիրայր Սեֆիլյանի եւ մյուսների գործով դատավճռին: Ըստ Պետրոս Մակեյանի՝ սա Բաղրամյան 26-ից իջեցված վրեժխնդրության վճիռ էր, քանի որ ապրիլյան պատերազմի բոլոր խութերը բացահայտեց Ժիրայր Սեֆիլյանը: « Արցախյան պատերազմի հերոսների մեծ մասը այսօր բանտված են եւ դա նշանակում է կոտրել ժողովրդի հոգին: Տարածքներ հանձնելու խոչընդոտները պետք է վերացվեր»,- ասաց ճակատի անդամը: Իսկ Ժառանգության փոխնախագահ Սուսաննա Մուրադյանն էլ ավելացնում է. «Այս մարդը ոչ միայն վախենում է հաղթածներից , այլ կայանում է նրանց փակելով: Ժիրայր Սեֆիլյանի եւ Սամվել Բաբայանի նկատմամբ վրեժխնդրություն է իրականացվում, որպեսզի հերթական վերարտադրությանը չխանգարեն»: Մանրամասները՝ տեսանյութում: