ՇՊՀ-ում դասադուլ է (տեսանյութ)
Շիրակի պետական համալսարանի ուսանողների մի մասը դասադուլ է հայտարարել: Նրանք բողոքում են համալսարանի ռեկտոր Սահակ Մինասյանի որոշումների դեմ, որի արդյունքում աշխատանքից ազատվել եմ դասախոսներ՝ Հովհաննես Խորիկյանը եւ Գագիկ Համբարյանը։ Ուսանողների պահանջը հետեւյալն է. «Աշխատանքի վերադարձնել դասախոսներին, ապահովել մարտի 24-ին կայանալիք գիտխորհրդի եւ հոգաբարձուների խորհրդի համատեղ ընդլայնված նիստի թափանցիկությունը, ինչպես նաեւ ապահովել բուհի ֆինանսական վիճակի թափանցիկությունը »: Համալսարանի պրոռեկտոր՝ Երվանդ Սերոբյանն ուսանողների գործողությունները համարում է ուղղորդված: Նա պնդում է, որ համալսարանում երբեք կամայականություններ չեն եղել ։ «Եթե Սահակ Մինասյանն ազատել է դասախոսներին աշխատանքից, դիմեք դատարան , թող պատժեն ռեկտորին: Ուսանողներին կոչ կանեի չխաթարել դասապրոցեսը »: Ուսանողներին չի գոհացնում նաեւ բուհում տիրող բարոյահոգեբանական մթնոլորտը: «Երբ սեփական կարծիք ունես, այդ ժամանակ ստանում ես համապատասխան վերաբերմունք: Կամ պետք է լինես կամակատար, հակառակ դեպքում իրենց թշնամին ես », ասում է Շիրակի պետական համալսարանի ուսանողական խորհրդի նախագահ Արմեն Մելքոնյանը: Նա նաեւ նշեց, որ փորձում են ծնողների միջոցով ստիպել իրեն չբողոքել: «Իմ ազգականների կողմից զանգ եմ ստացել, ըստ որի ռեկտոր Մինասյանի կինը խնդրում է, որ հայրս ներկայանա իրենց տուն: Ձեր հուսահատ քայլերը իմ վրա բացարձակ ազդեցություն չեն ունենա: Իմ ընտանիքում իմ որոշումների հետ հաշվի են նստում »: Ուսանողները նաեւ բաց նամակ են հղել Սերժ Սարգսյանին: Նամակն արդեն մոտ 65 ուսանող է ստորագրել, օնլայն հարթակում ուսանողներն ունեն 200-ից ավելի համակիր: Ի դեպ, նախորդ շաբաթվա վերջին Կրթության եւ գիտության նախարար Լևոն Մկրտչյանը հայտարարել է, որ մարտի 24-ին գիտխորհրդի և կառավարման խորհրդի համատեղ ընդլայնված նիստ է լինելու և կքննարկեն նաեւ այս հարցը։