Ազատազրկումը պետք է լինի որպես բացառիկ միջոց. ՄԻՊ (տեսանյութ)
Պայմանական վաղաժամկետ ազատ արձակման ինստիտուտը մեր երկրում արդյունավետ չի գործում. «Դրանք ժամանակի ընթացքում անընդհատ ենթարկվել են փոփոխությունների, բարեփոխումների, բայց միեւնույնն է դա չի աշխատում: Հանձնաժողովներում ունենք ընկալումների, ձեւավորումների փոփոխության ակնհայտ խնդիր: Մենք ունենք կարծրատիպեր, եթե անձը դատապարտված է, ապա վաղաժամկետ չի կարող ազատ արձակվել»,- այսօր լրագրողներին ասաց Մարդու իրավունքների պաշտպան Արման Թաթոյանը: Նրա խոսքերով՝ երբ դատապարտյալը հայտնվում է քրեակատարողական հիմնարկում, առաջին օրվանից սկսած աշխատանքներ պետք է տարվեն նրան ազատ արձակելու նախապատրաստման համար. «Անթույլատրելի է, երբ պետությունը աշխատանքներ չի տանում նրան ազատ արձակելու համար եւ վաղաժամկետ ազատ արձակման հարցը լուծելիս հայտարարում, որ նա պատրաստ չէ ազատ արձակման»: ՄԻՊ-ը մշակել է փաթեթ, որով առաջարկում է ընտանիքի հետ կապի առումով բարեփոխել գրեթե ողջ օրենսդրական համակարգը. «Առաջարկում ենք մի մոտեցում, որ նախաքննության փաստը չի կարող որպես այդպիսին հիմք դառնալ, ընտանիքի հետ կապը կալանավորի դեպքում սահմանափակելու համար»: Արման Թաթոյանի խոսքով՝ մենք պետք է ունենանք այնպիսի ճկուն համակարգ, որ ազատազրկումը լինի որպես բացառիկ միջոց, եւ ազատազրկումը չի կարող դառնալ գլխավոր միջոց: Անդրադառնալով Երեւանի ավագանու նիստերը դռնփակ անցկացնելու առաջարկին, Մարդու իրավունքների պաշտպանը նշում է, որ դա ընդունելի չէ իր համար. «Այդ ժամանակ զգացինք միտում՝ լրագրողին մի տեսակ օտարացնելու պետական համակարգից: Սա վտանգավոր ընկալում է եւ չպետք է թողենք, որ ձեւավորվի»: Ինչ վերաբերում է կառավարության նիստերին, ապա դա բոլորովին այլ խնդիր է: Ոչ միայն լրագրողները չեն հետեւի նիստին, այլ նաեւ Երեւանի քաղաքապետը, Մարդու իրավունքների պաշտպանը, Գլխավոր դատախազը: Խորհրդարանական կառավարման մոդելի դեպքում բոլոր անկախ մարմինները չեն մասնակցում: Մարդու իրավունքների պաշտպանը միաժամանակ նշում է՝ իրենց լիազորությունները կառավարության գործունեության վերահսկողության առումով ավելի են ընդլայնվել: