Հացադուլի մեջ գտնվողն ուշագնաց է եղել. փաստաբան (տեսանյութ)
«Նուբարաշեն» ՔԿՀ-ում 34 օր հացադուլի մեջ գտնվող Արկադի Պապյանի առողջական վիճակը գնալով վատթարանում է: «Չկարողացավ անգամ գալ տեսակցությունների սենյակ: Ես ինքս եմ հանդիպել նրան խցում, թուլություն կար եւ բողոքում էր սրտի աշխատանքից: Պաշտպանյալս հայտարարել է, որ մի քանի անգամ ուշագնաց է եղել՝ պայմանավորված առողջական վիճակի վատթարացմամբ»,- «Ա1+»-ին ասաց երեկ նրան տեսակցած պաշտպան Ամրամ Մակինյանը: Հացադուլ հայտարարելով՝ 43-ամյա Արկադի Պապյանն իր դժգոհությունն է հայտնում հարուցված նոր քրեական գործից: ՌԴ քաղաքացու սպանության համար՝ 9 տարվա ազատազրկման դատապարտված անձն հիմա էլ մեղադրվում է «Վանաձոր» ՔԿՀ պետ Գևորգ Մկրտչյանին մի քանի ամիս շարունակ կաշառք փոխանցելու համար, ինչի դիմաց նրան արտոնություններ են թույլ տրվել: «Առաջադրված մեղադրանքը քրեական գործով ձեռք բերված ապացույցներով հիմնավորված չէ, եւ Արկադի Պապյանը ընտրել է բողոքի ձայնը արտահայտելու այդ միջոցը»,- ասում է փաստաբանը: Արկադի Պապյանը պաշտպան Ամրամ Մակինյանին ասել է, թե մեղադրանքը պատվեր է. «Որոշակի անձանց է համարում պատվիրատուներ: Այս պահին լիազորված չեմ իր կողմից հայտարարել որոշակի անուններ: Արկադի Պապյանը գտնում է, որ իր նկատմամբ ինչ- որ հաշվեհարդար է կատարվում»: Արկադի Պապյանը հայտարարել է, որ այնքան ժամանակ է շարունակելու հացադուլը, մինչեւ մեղադրանքի փոփոխություն լինի: Նա նաեւ որոշել է առաջիկայում ընդհանրապես հրաժարվել բուժօգնությունից: Մինչդեռ Արկադի Պապյանի հացադուլի տևողությամբ պայմանավորված հայտարարություն է տարածել ՄԻՊ գրասենյակը՝ նշելով առողջական վիճակն այնպիսին է, որ պահանջում է բժշկական մշտական հսկողություն: Քրեակատարողական վարչության հանրային կապերի հետ բաժնից էլ փոխանցեցին, որ Արկադի Պապյանի առողջական վիճակը բավարար է: Նա գտնվում է բժիշկների մշտական հսկողության տակ:
