«ՀՀ նոր նախագահն անգլուխ ձիավոր է, մեռյալ դիակ» (տեսանյութ)
«Մեդիա կենտրոնում» տեղի է ունենում մամուլի ասուլիս «Վարչապետական դիկտատուրա՞, թե՞ պատասխանատու կառավարում»թեմայով: Նոր սահմանադրության համաձայն Ազգային Ժողովը ոչ մի նոր լիազորություններ չունի, ասում է ազգագրագետ Հրանուշ Խառատյանը: «Իշխանությունը կիրականացնի կառավարությունը, այսինքն դա կառավարության գործնական ֆունկցիան չէ միայն, սա նշանակելու է կառավարության կողմից իշխանության զավթում»: Պետական կառույցերի նկատման Ազգային Ժողովը ոչ մի վերահսկողություն չի ունենալու, դրանք վարչապետի տիրապետության ներքո են, ասում է Հայաստանի Հելսինկյան կոմիտեի նախագահ Ավետիք Իշխանյանը: «Թող ինձ ցույց տան մի պառլամենտական երկիր, որտեղ ուժային կառույցները վարչապետին են ենթարկվում: Սա միապետություն է, որը նախագահից փոխանցվում է վարչապետին»: Այս սահմանադրությամբ հիմք է դրվում նոր մարտի 1-ի, համոզված է Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը: «Նման պայմաններում իշխանությունը որոշումներ է ընդունում առանց հանրային կարծիքը հաշվի առելու, իսկ բողոքողների դեմ ուժ կիրառում: Այս սահմանադրությամբ վարչապետի նախաձեռնությամբ են միջազգային պայմանագրերը ստորագրվելու, նախագահը զուտ արարողակարգին մասնակցող է լինելու»: Կարելի էր «ՀՀ նախագահ» հասկացությունը դիտարկել որպես «թագուհու» կերպար, նախագահն ուղղակի անգլուխ ձիավոր է, մեռյալ դիակ, ավելացնում է Արթուր Սաքունցը: Հիշեցնենք, որ 2015 թվականին ընդունված Սահմանադրության համաձայն, ապրիլի 9-ից հետո Հայաստանն անցում կկատարի խորհրդարանական կառավարման համակարգի։