23-րդ ձմեռային օլիմպիական խաղերը փակվեցին. լուսանկարներ
Հարավկորեական Փհենչհան քաղաքում այսօր կայացավ 23-րդ ձմեռային օլիմպիական խաղերի փակման արարողությունը:
Միջազգային օլիմպիական կոմիտեի նախագահ Թոմաս Բախը հայտարարեց խաղերի փակման մասին: Օլիմպիական դրոշը նա հանձնեց Պեկինի քաղաքապետ Չեն Ցզինին, քանի որ հաջորդ՝ 24-րդ ձմեռային օլիմպիական խաղերը կայանալու են հենց Չինաստանի մայրաքաղաքում, 2022 թվականի փետրվարի 4-20-ը:
Ընթացիք օլիմպիական խաղերում թիմային հաշվարկով առաջին տեղը զբաղեցրեց Նորվեգիայի թիմը, որը նվաճեց 39 մեդալ՝ 14-ական ոսկե եւ արծաթե, 11՝ բրոնզե: Երկրորդ հորիզոնականը գրավեց Գերմանիայի թիմը՝ 31 մեդալ (14+10+7), երրորդ՝ Կանադան՝ 29 (11+8+10): Ընդհանուր առմամբ Փհենչհանում պատվո պատվանդան են բարձրացել 30 երկրների ներկայացուցիչներ, այդ թվում մեկական մեդալ նվաճել են Հունգարիան, Ուկրաինան, Բելգիան, Ղազախստանը, Լատվիան եւ Լիխտենշտեյնը:
Անհատական հաշվարկով օլիմպիական խաղերի 5 մեդալ է նվաճել նորվեգացի դահուկորդուհի Մարիտ Բյորգենը: Չորսական մեդալ իրենց հետ հայրենիք կտանեն շվեդացի դահուկորդուհիներ Շարլոտ Կալան եւ Ստինա Նիլսոնը:
Ոսկե մեդալների քանակով մրցակցությունից դուրս են նորվեգացի դահուկորդ Յոհանսեն Հոսֆլոտ Կլաեբոն եւ ֆրանսիացի բիաթլոնիստ Մարտին Ֆուրկադը, որոնք երեքական անգամ կանգնել են պատվո պատվանդանի առաջին աստիճանին:
Հիշեցնենք, որ Հայաստանն այս օլիմպիական խաղերում ներկայացել էր 3 մարզիկով՝ դահուկորդներ Կատյա Գալստյանն ու Միքայել Միքայելյանը եւ լեռնադահուկորդ Աշոտ Կարապետյանը:
