Քաղաքապետարանում լրագրողների աշխատանքը խոչընդոտվեց (տեսանյութ)
Փետրվարի 14-ից սկսած «Երկիր Ծիրանի» խմբակցությանը տրամադրված մեքենան չի կարողանում կայանել Երեւանի քաղաքապետարանի ավտոկայանատեղիում: «Մեզ թույլ չեն տալիս, որպեսզի մեքենան մուտք գործի այստեղ: Ասում են՝ ցուցակի մեջ չկա»,-ասում է Զարուհի Փոստանջյանը: «Երկիր Ծիրանի» խմբակցության ղեկավարը ցույց տվեց Երեւանի քաղաքապետարանի վարորդների համար նախատեսված սենյակը. «Մեր սենյակում նույնիսկ չեն գալիս աղբը հավաքում, իսկ այստեղ խաղասենյակի են վերածել»,- ասաց նա: Քաղաքապետարանում պտտվել և այլ վայրեր տեսնել լրագրողներին չթույլատրվեց: «Որեւէ լրագրող իրավունք չունի Երեւանի քաղաքապետարանի շենքում առանց մեր թույլտվության մտնելու եւ պտտվելու: Ոստիկաններին խնդրում եմ արդեն միջամտել: Տիկին Փոստանջյանը իրավունք ունի բացառապես իր աշխատասենյակ հրավիրելու»,-ասում է Երեւանի քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը: Կարճ ժամանակ անց արգելվեց նաեւ աշխատասենյակ բարձրանալը. «Տիկին Փոստանջյան, դուք արդեն խախտել եք կարգը»,- ավելացրեց Արթուր Գեւորգյանը: «Երկիր Ծիրանի» խմբակցության ղեկավարը հայտարարեց՝ Երեւանի քաղաքապետարանի տեղեկատվության եւ հասարակայնության հետ կապերի վարչության պետը քրեորեն պատժելի արարք է թույլ տալիս, քանի որ խոչընդոտում է լրագրողների եւ ավագանու աշխատանքը. «Խնդրում եմ մեկուսացրեք տվյալ անձին, նա ագրեսիվ է, հարձակում է գործել մեր խմբակցության անդամի վրա եւ հնարավոր է նորից հարձակում գործի»,- ասաց Զարուհի Փոստանջյանը: Զարուհի Փոստանջյանը նշում է՝ քաղաքապետարանը հանրային տարածք է. «գալիս էինք քաղաքապետարան, ասում էինք ինչի համար ենք գալիս, գալիս էինք քաղաքապետարանի կեղտը մաքրելու: Չես հասկանում՝ ինչ կարգավիճակում են, թղթախաղ են խաղում, ինչ են անում, կամ թմրամիջոց, ալկոհոլ օգտագործած են, թե ոչ»: «Ելք» խմբակցությունը Երեւանի քաղաքապետարանի ներքին կանոնակարգը մոտ երկու ամիս է չի կարողանում ստանալ: «Սա ապօրինություն է, որովհետեւ զգալիորեն սահմանափակվում է ավագանու գործունեությունը:Ավագանին վերահսկողական գործառույթներ ունի եւ կարող է դա իրականացնել»: Իսկ Զարուհի Փոստանջյանն այսօր իր աշխատասենյակում պատրաստվում էր մեկնաբանանել Երեւանի ավագանու փետրվարի 13-ի նիստի ժամանակ տեղի ունեցած միջադեպի առիթով քրեական գործ հարուցելու փաստը: Գործը հարուցվել է խուլիգանության եւ ծեծի հատկանիշներով: Արայիկ Հարությունյանը չի խուսափում անդրադառնալ հարուցված քրեական գործին. «Հանրապետական խմբակցության ներկայացուցիչները մեկնաբանություններ տվել են, ենթադրում եմ, որ նաեւ այդ ուղղությամբ բողոքներ գրած կլինեն, որպեսզի սլաքները հնարավորինս ծեծից թեքվեն»,- ասում է «Ելք» խմբակցության անդամը: Հիշեցնենք, որ փետրվարի 13-ին «Երկիր Ծիրանի» խմբակցության անդամները որոշել էին քաղաքապետ Տարոն Մարգարյանին հանձնել Նուբարաշեն համայնքի բնակիչների «նվերը»՝ գարշահոտ կոյուղաջրով սրվակները։ Ակցիան կանխվեց, իսկ ՀՀԿ-ականների կողմից Մարինա Խաչատրյանի նկատմամբ ֆիզիկական բռնություն կիրառվեց:
