Մարտի 1-ից որոշ դեղեր կվաճառվեն դեղատոմսով (տեսանյութ)
Մարտի 1-ից սկսած ուժի մեջ կմտնի դեղատոմսերով դեղերի բացթողման նոր կարգը: Դեղատոմսով դեղեր դուրս գրելու պրոցեսը շահեկան է, ասում է ՀՀ Առողջապահության նախարարի տեղակալ Սերգեյ Խաչատրյանը: «Այս դեպքում դեղի նշանակման պատասխանատվությունը ընկնում է բժիշկների վրա, որովհետեւ շատերն ուղղակի գալիս են դեղատուն եւ դեղատան աշխատակիցը, որը չունի համապատասխան կրթություն դեղ է նշանակում, ավելի ճիշտ՝ վաճառում»: Հայաստանում գրանցված մոտ 4700 անուն դեղից դեղատոմսով բաց թողնման ենթակա է 2700-ը: Սերգեյ Խաչատրյանը կիսում է այն մտավախությունը , որ այս գործընթացը պոլիկլինիկաներում կարող էհերթեր առաջացնել: Դրա համար, մարտի 1-ից դեղատոմսով կվաճառվեն միայն հակաբիոտիկները, հորմոնային պրեպարատները եւ կոդեին պարունակող դեղերը, իսկ հուլիսի 1-ից՝ բոլոր ներարկումային եւ հակաուռուցքային դեղերը, արդեն հոկտեմբերի 1-ից՝ մնացած բոլոր դեղերը: Արդեն հաստատված է դեղատոմսի մի ձև, որը նախատեսված է բազմակի օգտագործման համար, ինչպես քրոնիկ հիվանդի, այնպես էլ հաբով ձեռք բերողի համար: Դեղատոմսի կտրոնի մի մասը կմնա դեղատանը, պացիենտի շարժունակությունը ևս չի սահմանափակվի, նա կարող է ամեն անգամ տարբեր դեղատներից դեղ ձեռք բերել: Բազմակի օգտագործման համար նախատեսված դեղատոմսերն ուժի մեջ են վեց ամիս: Նախարարի տեղակալը շեշտում է, որ կստեղծվի հատուկ տեսչական մարմին, որը համապատասխան հսկողություն կիրականացնի դեղատներում: Սերգեյ Խաչատրյանը նաեւ ապավինում է դեղատան աշխատակիցների բարեխղճությանը, որ դեղերը կվաճառեն միայն դեղատոմսի առկայության դեպքում: Դեղատոմոսով եւ առանց դեղատոմսի բաց թողնվող դեղերի ցանկը տեղադրված է ՀՀ ԱՆ եւ «Դեղերի փորձագիտական կենտրոն» կայք-էջերում:
